好多大中華主義上腦嘅假左派，認定小弟呢挺港獨派，或陳雲呢挺自治派唔認識中國，或唔救中國。
呢啲讀壞書，燒壞腦嘅大中國主義分子，往往對中國有係幻想，並唔係真係認識中國。我諗有位台獨領袖嘅生平，會令大家明白，越認識當今中國，至會越反中國。呢位係台獨經典著作《台灣人四百年史》嘅作者史明。《台灣人四百年史》係今日了解台獨思想必讀著作，當然十個香港鬧台獨嘅友仔，九個無讀呢本書。
中共一向唔敢公開挑史明機，唔只因為史明真係好熟馬克思主義理論（真係熟馬克思主義會企喺獨派，抗拒中國殖民，所以我話香港好多假左仔），史明令中共最尷尬係，佢係一九三七年入中共控制下嘅日共，一九四二年去延安抗日，佢嘅資歷差唔多係中共元老級。如果話佢無參與救中國工作，唔好意思，江澤民、胡錦濤嘅中共黨齡全部唔係史明果皮。
佢之所以台獨，因為佢見過中共班友做嘢方式，亦睇過國民黨班友嘅做嘢方式，兩邊做嘢都係仆街嚟，同佢呢挺喺日本受教育嘅台灣人諗法唔同。史明可以講係日本精英，佢係早稻田大學政治經濟學系畢業。佢覺得中國人超唔妥，所以就完全對中國人死心，投向台獨運動。
陳雲投入中國民運可能比好多人深同廣，一九九三至九五年，佢係民主中國陣線德國分部主席，佢救過六百幾名當時喺德國嘅中國人。佢無欠中國，但佢同中國人打交道嘅經驗，亦會比好多人都深。所以佢變成自治派，我唔奇怪，史明走過咁嘅路，陳雲都會走咁嘅路，歷史係會重覆。
甚至李登輝提出建構新中原嘅理論，都係呢種海外華人蛻變站喺反中第一線嘅縮影，《武士道解題》係我一直要求任何研究台灣當代政治嘅人一定要睇嘅書，但《武士道解題》對好多人嚟講極難消化，因為大量引用四書五經，古文根柢少啲都係咁先。就算黃文雄寫嘅《哲人政治家，李登輝之「我」》，啲古文都係飛嚟飛去，無睇中國古籍習慣係消化唔嚟。李登輝嘅中華文化修養，比馬英九仲要好，但李登輝保留中國文化精粹，提出建立新中原嚟令台灣尋求自主，大家諗吓點解喇。好多獨派國學修養都唔差，特別日本返嚟果批，但你試吓叫果班國民黨二世祖引經據典，你睇吓邊個得。
香港假膠當道，有啲民族或國家無得救，真係無得救，亦無謂去救。香港做好自已獨立自主，就係對中華文化精要嘅最大救贖。係中國人欠我地（如果佢地仲珍視中華文化嘅話），我地完全無欠中國嘅。
後話：所以台獨無必要去中國化，因為依家呢個中國已經係垃圾，捍衛中華文化就係台獨正義之旗。如果再唔明，睇番德川光圀嘅歷史。《大日本史》係用古文寫，睇以下連結就明：
大日本史：卷之一百六 列傳第三十三
from MO's notebook 3.75G http://blog.martinoei.com/2012/01/%e8%aa%8d%e8%ad%98%e4%b8%ad%e5%9c%8b%e5%98%85%e4%ba%ba%e8%87%b3%e6%9c%83%e4%bc%81%e5%96%ba%e7%8d%a8%e6%b4%be%e6%9e%9c%e9%9d%a2/?utm_source=feedburner&utm_medium=feed&utm_campaign=Feed%3A+MosNotebook375g+%28MO%27s+notebook+3.75G%29
