作為一個平行進口商人，大家可能唔明，點解上水果啲水貨佬，或中國四圍搜購奶粉嘅友咁乞人憎，但香港759，或者正規入口水貨日本、美國奶粉嘅公司，好似小弟咁又無問題。
平行進口本身係正常商業行為， 但正常商業行為係有底線，就係唔可以擾民。
好似759阿信屋，或者小弟呢挺，對住大批量嘅貨，係唔會喺零售市場掃入嚟，因為零售市場貴，而郵寄或人肉寄運嘅成本仲貴，所以759阿信屋又好，小弟呢挺人又好，一般已經係透過互聯網向生產商落單，然後批發價掃發，再用大批量入口嘅優勢減運費成本，咁樣至賺到錢兼價錢合理。喺批發市場入貨，當然唔會擾民，相反，仲可以促進當地出口。更何況平行進口商其實唔係太想做奶粉，因為奶粉嘅運費同倉儲成本係貴，同一個櫃貨櫃，你寧願運零食都好過運奶粉，利潤唔成正比。
但依家之所以有中國水貨客，因為中國當局依家貪污，中國嘅奶粉三聚氰胺問題不止，呢班仆街又要閘住海外奶粉大手入口嚟搵銀，結果一堆「有關係」人士四出喺零售市場入貨。而由於市場被人為嚴重扭曲，中國嘅「水貨」零售價係香港零售價成倍，當中利潤俾乜人賺咗大家亦心知肚明。而零售市場本來無預你班友咁狂買法，結果市場大亂，亦擾亂民生。
所以上水果啲水貨客，一定要郁，因為佢地係擾亂民生。而水貨客可以咁猖狂，因為中國公安、海關包庇，甚至有份從中取利。所以唯一辦法，係香港收番簽證自主權，禁止呢啲瘟神入境。但如果香港唔獨立，睇怕都無乜可能。
from MO's notebook 3.75G http://blog.martinoei.com/2013/01/%e4%b8%ad%e5%9c%8b%e6%b0%b4%e8%b2%a8%e5%ae%a2%e6%9c%89%e4%b9%9c%e5%95%8f%e9%a1%8c/?utm_source=feedburner&utm_medium=feed&utm_campaign=Feed%3A+MosNotebook375g+%28MO%27s+notebook+3.75G%29
