位於太子港鐵站附近、兩層高的黃店cafe青花亭，昔日所有文宣已經被清走。不過，門口有5張新鮮出爐的，寫道：
「哪裏有國安法，那裏就沒有反抗，我們真像一家人」
「爹親娘親不及習大大親，我今日檢舉咗嗱，你檢舉咗未？」
「中港一家亲，淘寶免運最均真」
「中國我靠 (山），邪恐美帝，莫敢來犯」
「這老美的手機我砸了，換了一部國產的，反正一模一樣」文宣寫的是這些。胡尚佑攝文宣寫的是這些。胡尚佑攝
青花亭最為人熟悉的，是疫情期間的創意「限桌令」告示牌，引來不少likes，「今日疫情限自由，明日廿三伏線留，禁足禁聲封你喉。」店內也有不少抗爭文宣，如今，青花亭因國安法的來臨，將店內所有文宣搣掉。
店主Peter仔感嘆：「我曾經諗住繼續儲落去，呢啲係歷史事件，每發生一樣嘢就會出現另一樣嘢，無可能用新嗰啲，去replace舊嗰啲，當舊嗰啲唔存在。所以係無諗過架，但係當個句子政治意味太強嘅時候就要換，尤其國安法出咗。」
「我哋7月1日冇開，大家都有嘢做。」翌日早上，Peter仔一早收到不同黃店老闆的信息：「當初都諗住算啦唔搣，跟住去到一個位，係好多行家都send messages，話邊度搣緊，邊度已經有警察去。」他才有所顧慮，開始思考應否要將店內的文宣通通搣掉。
最後，他經過多番衡量後決定清走：「真係好可悲......但係唔可以為咗一張文宣而押咗自己間舖，建立咗咁耐嘅黃店。一間黃店冇咗就冇咗，養咗嗰班手足， 冇你嘅話，佢哋就冇飯食，呢啲係要取捨。」Peter仔的青花亭，聘請約20名員工。
但Peter仔覺得：「唔應該就咁就算。」他忽發奇想，想到可以用另一種方式，曲線提醒港人持續信念，於是他立即打開電腦，開始創作最新自家文宣：「國安法某程度針對嘅，係黃店同埋黃色經濟圈，佢哋就係唔想你用黃色政治做宣傳。但我哋而家就要不停咁樣試番條線出嚟，總唔能夠即刻唔做啲咩，如果大家可以慢慢做更多，係非常重要。」
有其他黃店選擇貼白紙、貼memo紙，Peter仔認為用意是好，但他會多做一步：「大家堅持咁耐，自我審查到一個極點，人哋都未做好多嘢，已經自我審查到呢個地步。貼白色紙，貼無內容嘅紙用意係好，但係一場運動或者當你想去改革一啲嘢，就唔可以淨係用往事諗番轉頭，唔可以不斷用白紙提醒，而係不斷有啲新嘅idea，去刺激佢哋去諗更加多嘢。」
他創作的5張顏色文宣，寫上「哪裏有國安法那裏就沒有反抗，我們真像一家人」、「爹親娘親不及習大大親，我今日檢舉咗嗱，你檢舉咗未？」、「中港一家亲，淘寶免運最均真」等字句。Peter仔說，文宣是參考內地酸民在論壇的說法。他笑說以前是「爹親娘親不及毛主席親」、「而家咪變咗習大大囉。佢都唔落台㗎啦，佢係皇帝嚟㗎啦。」
Peter仔有感國安法來臨，令市民和黃店的自我審查程度變得嚴重：「黃店以前可能好激進，貼到成間舖頭都係，一晚之後大家就搣晒，我覺得無可厚非。同埋香港人雖然應變能力強，但大家都係比較保守或者保護自己多啲。上年見到一間間黃店慢慢企出嚟，而家就好似股市咁獲利回吐，跌番落低位......」
Peter仔希望繼續貼文宣，寧願踩吓鋼線，亦不甘停濟不前：「一定係要有人再做番原本呢啲嘢，再去為大家踩下線、踩下鋼線、入下灰色地帶，睇吓係咪可以做多啲嘢。始終有啲嘢唔做唔試，就唔會見到有轉機。」
張貼新文宣不害怕有人「督灰」或秋後算帳？Peter仔說：「呢啲全部都係事實，只係描繪緊兩地之間文化嘅差異。無得夾硬用一個法律或者國安法，去同大家講啲文化差異，就算係煽動國家分裂。就算攞我上法庭呢啲都係事實。如果佢要challenge我，最多就話我洩露咗中國5000年優秀文化，而唔係我真係煽動國家或者散播仇恨情緒。」
「如果再連一兩句，40年嚟笑緊內地嘅嘢，都唔俾出嘅話，香港冇㗎啦，真係玩X完啦...... 」Peter仔慨嘆道。銅鑼灣食店「No Boundary」在店內設立「無字連儂牆」。胡尚佑攝店鋪繼續售賣「香港人自決常餐」 。胡尚佑攝店外的黃店證書昨未有拆走。胡尚佑攝
銅鑼灣食店No Boundary，在店內設立「無字連儂牆」，牆上有七彩繽紛的便利貼，沒有寫任何字。任職工程界的食客G先生大讚有創意：「我覺得呢個方式好好，知嘅人就會知，唔知嘅人就唔會知。」
或許有人批評店舖清走文宣，G先生就說理解他們的做法：「因為佢哋都驚咁惡嘅國安法，俾人秋後算帳。咁樣呢個時刻冇咗連儂牆，唔覺得佢哋係臨陣退縮，始終佢哋都要做保障，呢一刻有呢個需要。」G先生慨嘆可悲、離譜：「2047都未到，而家先過咗23年，就已經仲衰過大陸咁滯。立咗呢條國安法，大陸睇你唔順眼想點就點，係好恐怖嘅一件事，已經冇晒自由......」
有黃店應用程式因國安法停止運作，過去一年都靠它分辨黃藍店的G先生說，會憑記憶繼續光顧黃店：「平日基本上都係揀黃店，所以會有啲印象，都會揀番啲食開，或者去其他地區前都會先問朋友，有冇邊啲係黃嘅舖頭。」
G先生又說：「相信之後都會覺得有啲煩，唔知點樣搵番啲黃色舖頭。」他擔心日後不能在網上搜尋到有關黃店資訊，已經開始嘗試在社交平台儲存資訊，
記者今天走訪旺角、太子、銅鑼灣一帶，發覺不少以往貼滿文宣的店舖，如今不再，剩下的只有空無一物的牆壁......
原文連結 https://www.hkcnews.com/article/31607/%E9%BB%83%E8%89%B2%E7%B6%93%E6%BF%9F%E5%9C%88-%E6%B8%AF%E7%89%88%E5%9C%8B%E5%AE%89%E6%B3%95-%E9%9D%92%E8%8A%B1%E4%BA%AD-31607/%E9%BB%83%E5%BA%97%E8%B2%BC%E6%96%B0%E6%96%87%E5%AE%A3%EF%BC%9A%E3%80%8C%E5%93%AA%E8%A3%8F%E6%9C%89%E5%9C%8B%E5%AE%89%E6%B3%95%EF%BC%8C%E9%82%A3%E8%A3%8F%E5%B0%B1%E6%B2%92%E6%9C%89%E5%8F%8D%E6%8A%97%EF%BC%8C%E6%88%91%E5%80%91%E7%9C%9F%E5%83%8F%E4%B8%80%E5%AE%B6%E4%BA%BA%E3%80%8D
from 港文集 http://hktext.blogspot.com/2020/07/754.html
