在下認為公民黨輸就預咗, 但輸到咁就真係有少少眼都突埋
要賴落去菲傭同港珠澳大橋官司的影響的話, 但睇返黎志強、陳啟遠、黃家華、陳琬琛咁唔單止無輸, 仲係以可以大比數連任
似乎呢啲選舉結果又唔能夠完全解釋係受抹黑所影響。但睇返呢幾位嘅往績, 地區市務上都係非常扎實
咁即係話, 唔計美孚兩個區, 7/41 嘅結果似乎係正常不過的事。
如果硬要認定係菲傭同港珠澳大橋官司做成, 咁在就對於佢哋對抹黑行動嘅慢三拍反應, 就會加句：自己攞嚟
在下從公共行政、危機處理同政治公關角度去睇, 公民黨根本無作出過任何準備去應付呢啲預計之內的抹黑
坦白講, 港珠澳大橋官司唔係第一單同類案件架啦, 領匯盧少蘭早就係啦, 無理由無人或者無人識去準備點應付外界嘅抹黑喎。定還是恃住係律師為主, 憨居居以為講道理可以講得點呢?! 如果係就真係Too Simple, Always Naive
至於菲傭申請居港權一案, 的確係同類案件先河
但在下回望抹黑行動開始之際, 率先引用大律師公會守則「不能拒載」的, 並不是梁家傑、余若薇在大眾傳媒發出, 而只係一些聲稱係公民黨黨員嘅人在網上發放。幾日後梁家傑先至响報紙專欄長篇大論。
之後港共大玩種族主義, 在下也沒有看到公民黨領導層透過傳媒或網上平台發表批評這類右翼手法, 而只係下在、世澤兄等人不斷發功。
老老實實, 點解會係啲黨員做, 而黨領導會慢三拍? 又或者個黨我架, 點解佢哋唔做呀?
所以, 公民黨大敗真係唔可以抵賴!!!
至於社民連全軍覆沒, 比起公民黨嘅情況更加之意外
連陶君行扎根竹園十幾年、阿牛坐陣東區咁耐都可以輸, 再睇埋鍾碩殷、黃浩銘、吳謦燃呢幾位有落區做嘢的年青人的戰果
在下得出的結論係政團形象不被接受。
事實上, 响坊間而論, 「社民連」三字的印象係非常負面, 唔係爛仔所為就係掟嘢
睇返社記本身的經濟左派論述, 其實响當前資本家霸權的社會形勢下, 其實有相當市場
但點解啲人唔受呢, 睇嚟真係同個黨嘅形象有關。當然啦, 呢個亦要怪罪於傳媒方面, 硬係要將一啲香港市民討厭嘅畫面無限放大, 永不會客觀地去報導。
陶君行响記者會度表示「我哋嘅理念的確係小眾, 要市民接受係需要好長時間」
即係話, 社記應該係知道本身問題所在。
在下就寄語社民連, 認真思考如何實踐長毛响造勢大會當日的新口號：
從群眾中來, 到群眾中去
相信必定會有一番作為。
返回主頁
from 巴士佬 - 揸巴士? http://robustorlo.blogspot.com/2011/11/blog-post_09.html
