港區國安法生效，許多香港人感到2047已至，對一國兩制不抱希望。時事評論員程翔接受眾新聞專訪，同樣深感一國兩制不復存在，他指出國安法破壞香港法制、人權保障，並批評國安法荒謬：「立法逼我哋承認中國共產黨的執政地位」 。
雖然情況很壞，但他在訪問末段說：「我睇完（國安法）全文之後，我感覺就係『楚雖三戶，亡秦必楚』。你唔好睇香港咁豆釘、咁細，從香港近150年的能量，係完全唔能夠睇小」 、「你（中共）掐死香港的時候，個後遺症係足以摧毀共產黨，我有呢個信心。」
程翔認為，港區國安法比中國2015年通過的國安法更辣。譬如港區國安法可以針對外國人，因為第38條列明，不具有香港永久性居民身份的人在港區以外觸犯港區國安法者，「適用本法」。但程翔估計在外國被引渡的機會不大，因為通常需要「雙重犯罪（double criminality）」，即有關罪行在該人身處國家亦同樣犯法，才能引渡。
另外就是以言入罪，程翔指出，港區國安法下的分裂國家罪，是「不論是否使用武力或者以武力相威脅」，這有違國際認可的《約翰內斯堡原則》。原則中有關可能威脅國家安全的言論，訂明「該言論是為了煽動即將到來的暴力」才可以進行處罰。「如果我無用即時武力，就唔會有即時危險⋯⋯即使係中國國安法，都唔會咁樣入罪，所以真係大鑊。」程翔說。
程翔續提出，分裂國家最嚴重的是中國共產黨：「我作為一個中國公民，我可唔可以去警察局檢舉江澤民同中國共產黨？佢同俄羅斯簽新的邊界條約，使到好大部分的中國領土，從中國分離出去，實際上係放棄了150萬平方公里領土。我呢個似係攞嚟講，我亦都明白知道，香港警察係唔敢立案。但係我想指出，你而家針對人將香港或者中國其他部分分離出去，我只係想提醒全香港的市民、全中國的人民，其實若果根據佢呢條法律，係有足夠道理檢控江澤民同中國共產黨。」
程翔又批評，港區國安法不僅寫得嚴厲，更是荒謬，尤其在於以法律禁止人民挑戰共產黨執政地位。他指，中共與香港人的標準不同，在中共眼中，批評執政黨等於反對國家，即所謂「反共反華」；但香港社會的反共不等於反華，譬如說想有政黨輪替，可能是對國家有利的。他形容：「透過一條法律，強制人民支持、擁護共產黨的執政地位。但我們在香港，一個政權的合法性，係在於政績同埋人民授權。」
他續說：「譬如話舊年林鄭搞到一鑊泡，為香港帶來咁大災難，我哋市民要求換政府係好legitimate的事，但係而家呢條國安法，我哋就係嚴重干擾、阻撓、破壞香港政權機關依法履行職能（即干犯顛覆國家政權罪）。林鄭自己都承認，在閉門會議的錄音，佢話有得選擇的話會辭職。佢如果辭職，呢個係正常的做法，你做得唔好，你落台。」
程翔又提到，今次港區國安法的立法程序不符規定。香港本地立法須經立法會三讀通過，少則需時半年；即使是中央立法，按中國《立法法》須經全國人大常委會三次審議，會期每2個月一次，故理應也要用上幾個月時間。
他續批評港區國安法內容對人權保障的破壞，譬如第60條，容許中央駐港的國安公署人員，在執行職務時不受香港執法人員檢查、搜查和扣押，變相中共堂而皇之在香港捉人。第4、5條，談及人權保障「好好聽」，一如中國法律所寫，但第62條一句「香港特別行政區本地法律規定與本法不一致的，適用本法規定。」就將前述保障盡廢，而且釋法權在全國人大常委會。還有涉國家秘密案件禁止新聞界旁聽、不准保釋的規定（除非法官有充足理由相信其不會再犯）、律政司可指示不設陪審團等，程翔形容，與中國內地完全一樣。
生於1949年的程翔，曾經被中共以涉嫌洩露國家機密、違反中國國安法為由，於2006年被判監5年，2008年獲假釋外出。回想當年經歷，程翔說：「中共的法律係完美到你好難去挑剔，但係中共的法律都係寫出嚟俾你睇，佢實行起上來，唔係咁樣實行。」
2005年他在廣州被捕，結果被拘留三星期後，才獲聯絡家人；被拘留一年後，才獲見律師。而根據中國《刑事訴訟法》，被拘留後24小時內應當通知家人；被拘留當日起可以聘請律師、律師有權會見在柙被捕者。
程翔指出，雖然中國憲法寫明保障人權、自由，但最高人民法院有個內部的「司法解釋」，指一般案件審理過程之中，不能夠援引憲法，「公布出來啲嘢大家覺得好正，但內部的司法解釋全部推翻晒⋯⋯你見到劉曉波，寫個《零八憲章》，罪不至死吧？但就坐監坐到死為止，臨死先放走佢。即係話，中國表面上講啲嘢，同做的完全唔同。」
程翔說：「（香港人）點樣自處呢。我自己覺得就係話，唔好在明顯的場合講啲好明顯的說話。譬如眾志成班後生仔，好有智慧，解散。首先你要保存自己，唔係話怕死、膽怯，而係在一個咁嚴酷的環境底下，第一件事係保存有生力量 。你被拉之後，郁吓就三碌（坐監三年）。所以我覺得，唔好在風浪尖上面同佢頂，一定係輸的，我覺得唔值得，我哋可以用更多食腦的辦法同佢抗爭。」
事實上，自港區國安法6月30日在全國人大常委會通過，多個香港「獨派」組織解散香港本部、香港眾志解散、國際游說組織都陸續解散。香港似乎迎來了「流亡與地下化」的時代？「係啊，但我都仲係樂觀。我睇完呢個（國安）法之後，不期然諗起一句成語：三戶亡秦。」程翔說。
楚雖三戶，亡秦必楚。呢個係春秋戰國時代的講法，秦始皇統一六國，同高壓手段鎮壓各國人民、大肆殺戮，鎮壓到楚國的時候，楚國就話就算你殺剩我三戶人家，最後亡你秦的就係我呢三戶人。當然秦始皇最後亦無殺盡楚人，但係呢句說話就係楚人表達對秦高壓的不滿。 」
程翔續指出，香港雖然「豆釘」，但每每在中國向現代文明邁進一步的時候，都有其角色：「晚清70年如是、民國如是，甚至乎共產黨奪權的時候，唔好忘記共產黨曾經整個南方指揮中心，就在香港，可見得香港在全國的功能作用。韓戰的時候，聯合國對中國禁運，你之所以唔死得，就係因為有香港，霍英東當年就係靠走私違禁品俾你中國大陸，先至救到你的物資需要。跟住你閉關鎖國、餓死人的時候，全部都係靠香港的物資輸送。」
他更憶起，那些時候試過大熱天時穿著幾件羊毛衫或綿衲，返到中國大陸的鄉下就除低留給親戚，「然後著住底衫底褲落返來香港，呢啲係我哋呢個年齡層的集體記憶。」
「文革後，改革開放之所以成功，就係靠香港，呢樣嘢唔係我哋香港人自己吹噓。」程翔續引述報道指，前蘇聯最後執政者戈爾巴喬夫，就曾經在訪華時說過，蘇聯未能像中國及時展開經濟體制改革，是因為蘇聯沒有香港這樣高度資本主義化的城市和通往西方的管道。
你而家一錘扑落來，我先唔講你忘恩負義那一筆，你一錘扑死香港，扑死香港的後遺症，分分鐘會導致你中共自己崩潰。我唔係吹牛，因為歷史上能夠將一個咁龐大、落後的經濟體推向繁榮、中共而家至少係第二大經濟體，到你掐死香港的時候，個後遺症係足以摧毀共產黨，我有呢個信心。
from 眾新聞 https://www.hkcnews.com/article/31567/%E5%9C%8B%E5%AE%89%E6%B3%95-%E7%A8%8B%E7%BF%94-%E4%B8%AD%E5%9C%8B%E5%85%B1%E7%94%A2%E9%BB%A8-31567/%E3%80%90%E6%B8%AF%E5%8D%80%E5%9C%8B%E5%AE%89%E6%B3%95%E3%80%91%E7%A8%8B%E7%BF%94%EF%BC%9A%E4%BD%A0%E6%8E%90%E6%AD%BB%E9%A6%99%E6%B8%AF%E7%9A%84%E6%99%82%E5%80%99%EF%BC%8C%E5%80%8B%E5%BE%8C%E9%81%BA%E7%97%87%E4%BF%82%E8%B6%B3%E4%BB%A5%E6%91%A7%E6%AF%80%E5%85%B1%E7%94%A2%E9%BB%A8
