星期日生活 2013年6月30日
【明報專訊】尊子漫畫諷刺時弊，以一針見血著稱，真人卻像個頑童，雖然頭髮花白，卻是臉圓圓、笑嘻嘻的，「漫畫佬好多時呢，笑人之前就會笑自己先嘅，自嘲係第一步。」
2003年七一街頭，50萬黑衣人潮中，處處見人舉着他畫的「不要董建華」海報，他還是笑言自己沒什麼影響力，「係《蘋果》肯花成本，印咁靚周街派之嘛。」
十年前，畫老懵董的後頸肥肉，畫得輕快；十年後，對象換成CY，笑意不再，「CY是要認真對付的，佢比董建華聰明好多，cunning好多。」
如何用一格漫畫刺破他的語言偽術，尊子花的時間心力都比從前倍增。
旁人敬佩他多年來每日畫幾個專欄，創作力仍源源不絕，他卻覺得其實不難，「畫漫畫基本上是跟新聞走的，如果你在新西蘭畫就慘啲，無乜事發生，成日就見住啲羊。但香港是個好活躍的地方，每日都有好多新聞，有新聞就有漫畫」。
30年了，尊子每天追着新聞畫，卻感到就這樣畫來畫去，社會不會因而有什麼改變，「好似有點無力感，一個人無乜力量的」。
眼見戴耀廷和一班從前想像不到會站出來的人，都紛紛決志佔中，「你會反思，咁我們又做了什麼呢？係咪漫畫界都應該有個人出來揸起支旗幫佢呢？但未有喎，咁咪自己做囉」。加上見到余若薇在街頭論壇說起，佔中爭普選的成敗，就看整個運動是否能落地、影響到街坊層面，尊子就想，漫畫對社會大眾的親和力，是否可在這過程中發揮一臂之力？
「漫畫刁民」聯盟 七一擺街站
「聯絡起嚟就發覺，原來好多人都想郁的，都想做啲嘢，只係未有第一個人行出嚟打電話。」幾下手勢，十幾廿個本地漫畫家便組成了「漫畫刁民」的聯盟，打算為爭取民主普選「玩鋪勁」。
明天七一，若你再次走在遊行途上，便會見到這位白頭叔叔和一眾漫畫家擺街站派傳單，宣傳他們的首個主題展覽。
尊子1980年代開始畫政治漫畫，當時已有類似的漫畫家聯盟，「一班後生仔，有馬龍啦、一木啦，楊維邦啦，組成『漫畫研究社』。那時是中英談判開始，有關於政制發展的爭拗，民生問題如興建大亞灣核電站，我們都畫漫畫和搞活動去回應社會事件。當時好多朋友都任職報館，容易聚頭，放工消夜就傾吓搞乜囉。後來有些轉了行，或無再畫，就較少見面。有一段頗長時間，沒再組織起來搞活動。係反廿三條那時搞過一次，今次有佔中爭普選這件事，我就覺得不如再試吓啦。」當年的老朋友，有些已放下畫筆，馬龍、一木就依舊力撐，還多了不少新朋友進來，像黃照達、智海、江記、Cuson等等，「好多我在報紙或網上見過佢哋啲畫，但都是今次搞起來才識到佢哋真人，有些還未聯絡上。現在網站set好了，希望係好開放的，所有畫漫畫的人都可以加入」。
畫時事漫畫 就是永遠的反對派
名為「漫畫刁民」，是眾成員投票討論後選出的。「畫時事漫畫，就是永遠的反對派嚟嘅，邊個上台就畫邊個囉，如果李柱銘上場就畫李柱銘囉。」他笑言，「刁民」這個字都甚貼切，「漫畫有時係唔講理由的嘛，這個媒介是好特別的，背後是理性的，但出到來張漫畫是訴諸感情的。因為在一個小方塊或者幾格裏面，唔似一篇文章可以有頭有尾講晒件事出嚟、講好多理據。」尊子認為，漫畫呈現的很多時不是大道理，大道理只存在於漫畫家自己的腦裏，畫出來的，已是思索過後的意見和想法，「好似一個點子、一下火花咁，都是好短促、訴諸感性的、pin point式的，刺激人們的思考和興趣。未必一定是搞笑，雖然笑是一個幾好的手段，但畫出來令到人喊都好呀，令到人嬲又可以，令到人暈咗喺度嘅，就最好啦！」
九七後報章政治漫畫愈來愈少
這種力量，往往為極權所忌諱。九七前尊子在藝術中心辦個人的大型回顧展，很多人猜想回歸後他是否會迫於言論自由收窄而擱筆，然而由老懵董、煲呔曾畫到CY，尊子的漫畫專欄還是好端端，「我自己睇就係有變化的，但一般人不會知道，不會感覺到。九七前差不多份份報紙的編輯都想搵人畫，打電話來問有無人可以介紹；但九七後愈來愈少，報紙上有漫畫，但肯畀一個畫政治漫畫的就不多，大約有四五份比較大眾化的、入屋的報紙，本來有政情漫畫的欄，都愈來愈縮，甚至cut了。」政權不喜、報章顧忌，因為漫畫形象突出，觀者易入腦，編輯又難審查，「寫文章佢有得改你的字眼，或抽起說你脫稿一天，搵第二個攝都得。但漫畫就好難，無理由個編輯塗咗你幅畫自己加嘢落去，雖然都試過，有漫畫家畫時用電腦打對白，點知出嚟嘅對白唔同晒，佢話哎，咁都得嘅！」「所以你就用手寫字了？」尊子哈哈大笑。
不知不覺畫了30年，「技術上來講，睇番自己早期的畫，好仔細、勾晒線，畫畫吓就放鬆了點。睇到外國的漫畫，好多珠玉在前，有些漫畫家直情畫火柴人公仔，都可以表達到好搞笑、好深刻嘅內容，有些直情唔用畫，搵啲字嚟整四格漫畫都可以嘅，變咗『畫』這件事未必一定咁重要。有陣時倒番轉頭添，無idea時就要畫得靚啲，有些人就以為『哇，你好犀利！』但如果有內涵時，個信息帶到出嚟，就可以畫得好簡單。」
CY難對付 重思考多於畫功
現在尊子的心機，花在思考上多於畫功。CY無論在實際的政治環境，還是作為漫畫角色，都比他的前兩任難對付得多。「董建華係個old fashion一點的長者，佢有趣些，可以用來搞笑呀，好多滑稽嘢，其實就輕鬆啲。但要解構CY講的說話，捉到佢裏面的漏洞，演化成漫畫，而大家都理解到佢句說話的問題所在，是需要一些技巧去做。否則就好容易畀讀者覺得，唓，你成日都鬧佢㗎啦，覺得係你無道理，所以CY是需要認真對付的人來的，要認真啲。」比如早幾天CY忽然自數政績，還說「我唔會自滿」，「如果董建華一定唔會咁講，唔係佢治下的成績，佢唔會講成係自己功勞，曾蔭權都唔會講。明知道這是假的陳述，但CY係會咁講出來。假如你是個外來人，打開電視聽到CY講這些說話，你會覺得，哇做了咁多事、又唔自滿喎，真係好。但你日日都見住佢時，你會知道這句說話包含了什麼意思，佢目前遇到什麼困境，點解要用這個方法來講這句說話？這是個好多層次的問題。」結果尊子畫了一個人，整個栽進了糞坑裏，弄得髒污四溢，還舉着「我不會自滿」的牌子；另一幅則是CY化身成屠夫，殺雞取卵到一屋鮮血後擺出一小盤雞蛋，還舉起勝利手勢說「上任一年，成績共睹！」
很多人對回歸後香港民主發展急劇惡化，憂心忡忡，尊子覺得近年所見，不是一面倒地壞，「有時會有好負面的，像區議會、立法會選舉那些選票的轉向，你覺得，哎呀，啲人真係咁現實；但另一方面你見到反國教事件，原來後生仔咁樣的，或者其他成年人都肯企出來喎，又令你好鼓舞。」對於香港前景，他不顯得灰心或「恐共」，「大陸的影響是一個方面啦，而另一方面是香港人自己本身的，大家都唔理唔出聲，無乜所謂時，問題就大了。我相信每個崗位上的人，做教師又好，做傳媒又好，大家都堅持返一啲嘢，企硬一點，就算大陸想改變你，都好棘手」。
爭取普選難在實行 讚賞佔中
這次尊子帶頭發起聯盟，便是想身為漫畫家的，也可以一起做點事。頭炮活動在8月，除了在中環的畫廊擺展覽，又跟油麻地的藝術團體活化廳一拍即合，「有些朋友介紹說，他們很強調社區街坊同藝術的關係，於是我們聯絡問有無興趣合作，他們就說好呀，過嚟啦！我們覺得作品的內容更緊要，唔需要一定係專業的畫家，任何街坊有意見有睇法的，都可以嚟，最好就係職業畫家都可以同大眾一齊畫漫畫，擺在同一個地方，而唔係分隔開來。」畫展以外，也想辦其他關於民主普選的工作坊或活動。雖然最初發起聯盟是受到佔領中環所觸動，但由於漫畫家成員對佔領中環這手段未有一致看法，所以將範圍擴闊一點，以「爭取普選」為最大公因數。尊子個人亦認為，佔中作為方法，最終可能未必需要實行，還看未來一年的事態發展，但他很讚賞戴耀廷等人到目前為止的努力，「作為一個畫漫畫的人呢，要諗50個古怪方法去爭取普選，係唔難的，難係難在實行，邊個人在咩時間、講啲乜才能召喚到大眾去完成同一件事，然後製造到壓力出嚟，這個過程是需要好仔細的計劃，而且要執行得到，這才是困難。佔中到現在為止，有人切實在做緊這件事，而且是向前行緊、仲行得通的。但由現在起到明年，會發生乜事都好難講，大家要珍惜這樣嘢囉，如果支持得到就去支持啦」。
文：林茵
圖：葉家豪、受訪者提供
編輯 葉雨舟
from Vicsforum - One man's forum http://vicsforum.blogspot.com/2013/07/blog-post_1.html
