喺樂易玲為咗唔想王維基攞到牌入侵嘅形勢下，佢控制下嘅無線俾《天與地》做最佳劇集，呢個安排小弟稱之為「假普選綵排」，等大家自以為得TVB世界感覺良好，無咁大動力支持開放電視市場。
當然樂小姐嘅陽謀，阿水都識穿，大佬，無王維基，你樂小姐會敢俾《天與地》？恐怕仲要睇林峯喺度Chok嚟Chok去。但呢次樂小姐顧住自己屁股嘅決定，梁振英同北京都多得佢唔少：
1. 無論大家點睇都好，《天與地》，2012年反國教運動，dbc抗爭運動基本上已經分唔開，因為後兩者幾乎係《天與地》結局果幕嘅實務上演，而元旦反梁運動吹雞在即，討論《天與地》得獎熱潮，重溫《天與地》片段等同提早吹雞，樂小姐呢鋪真係多謝你。
2. 習近平上台後嘅北京政局簡直一片混沌，好多怪事都有，而《天與地》獲獎喺中國會再捲起互聯網討論旋風，呢個係會對北京政治氣候有影響。
所以《天與地》由2012年1月1日元旦結局播出，到2013年1月1日元旦，勢必開花結果。
《天與地》如果公投下成功，不單反映香港脫離緊當年《輪流傳》失敗反映嘅關鍵性挫折，更反映係，香港依家政治制度，跟本完全追唔上社會，特別社會年青一輩心態進步，政制堅持扯後腿嘅結果，歷史話俾大家聽，答案係革命，喺香港，甚至係港中分家。因為中國呢個政權嘅思維方式停留喺清王朝，但香港人就入咗廿一世紀西方文明社會，甚至陶傑喺今期《茶杯》雜誌提出嘅New Normal，差距可能有成一至兩個世紀，落差咁大嘅結果，大家都估到有幾大鑊。
革命來臨香港已經唔係嚟唔嚟嘅問題，係點嚟同幾時嚟嘅問題。
from MO's notebook 3.75G http://blog.martinoei.com/2012/12/%e4%b8%80%e5%88%87%e9%83%bd%e5%9a%9f%e8%87%aa%e5%a4%a9%e8%88%87%e5%9c%b0/?utm_source=feedburner&utm_medium=feed&utm_campaign=Feed%3A+MosNotebook375g+%28MO%27s+notebook+3.75G%29
