人行發表報告，指有55.5%受訪者表示，未來3個月「更願意儲蓄」。
1：中國與世衞就武漢肺炎扯貓尾，累全球攬炒。當歐美仲停擺，中國就逐步解封，好聽講就係first-in-first-out，講白啲就係早死早享受，家陣仲威到吹捧炒復甦。
2：好多人就話：「中國人困住喺屋企咁耐，抑制咗幾個月嘅消費欲一定會大爆發，報復性消費指日可待！」
3：果然，唔少名牌復市，唔少中國大媽，就如一隻餓咗十日嘅獅子聞到血腥味一樣，衝落舖掃包包。Hermès廣州店月中重開，單日營業額達破紀錄1,900萬人民幣！Louis Vuitton中國分店，於今個月首三星期，營業額比上年同期暴增五成！化妝品代表L'oreal亦都報捷，話3月中國銷售錄增長，相信4月可以再錄5%至10%增張。
4：條數係好靚嘅……好似。不過，維唔維持到係一個問題。首先，中國人集慣去外國旅行時掃貨，據大摩數據，上年中國人去外國掃貨，為LVMH、Kering、Richemont貢獻32%至44%收入，比起中國本地貢獻約一成至17%多一截。不過，而家唔好話法國、意大利，連落香港都要先隔離。飛唔到去外地買包包，為止止癮，咪直接去屋企附近買包包。此完癮，然後呢？有錢咪有然後囉。
5：據市場調查機構貝恩，中國人2019年貢獻全球奢侈品市場35%，更加為行業增長貢獻九成。可以話係，沒有中國，LV大檸樂。最新貝恩又發報告，預期奢侈品市場規模將萎縮15%至35%，全年損失預計600至700億歐元。
6：問題係，中國經濟差係不爭事實，首季GDP按年錄衰退6.8%，較市場預期的6%為差，作為世界工廠，歐美未復甦，都冇客，中國復工來都係托。生意難做，仲講使錢？講嘅係儲錢，仲要係「報復性儲錢」
7：內地接連有調查指，未來有更多人希望要儲錢，先有西南財經大學、螞蟻金服研究院發報告，話五成的家庭會增加儲蓄並減少消費，呢份報告係上星期嘅。最近又有一份，話有55.5%人表示，未來3個月「更願意儲蓄」，動機方面，有53.5%的居民選擇「養老、防病、防失業」。留意返，呢份報告係人行做嘅。
8：唔好理份調查報告有幾多真係調查返來，就唔好深究太多，無益。但有一件事一定係真，就係中國吹緊風向，希望鼓勵大家儲多個錢，唔好使錢。
9：中國無啦啦叫你慳住使？令我幻想到一個老土情節，一個土豪走去個仔講：「你仲買嘢？家道中落呀！衰仔」
10：與此同時，當Hermès一間舖日袋1,900萬，一代港產潮牌思捷（330）決定執晒全亞洲56間分店，睇返通告，呢56間分店九個月收入夾埋只係2.67億元，除開每間舖每個月只係做53萬生意，即係每間舖一日生意額1.8萬都冇……
by千頌C@堆填區
http://fb.com/winbigwok
from 也是這裡，也在這裡～ http://ktoyhk.blogspot.com/2020/04/20200428-c.html
