到目前為止，政府發言人只係低調咁回應咗一句話「有關傳聞，全屬失實」【註一】，又唔提供任何佐證話點解係謠傳，證明我地擊中咗要害。好啦，你唔交代，咁就又輪到我地再提供更多斷正佐證嘅時間啦，Round 2。
政府話「失實」嘅資料係由政府提供
首先要指出嘅係，我地之前新屋嶺變「新疆嶺」篇文【註二】，成篇都係引述番你地官方文件嘅資料。個「特別行動訓練設施」，又係你自己交出嚟嗰份立法會文件講，個警察設施用嚟做「反恐」嘅「高級戰術培訓設施」，又係你自己講【註三】。
依家你話係「全屬失實」，咁係你想講自己捏造文書呃立法會定點？
超級監獄變「新疆嶺」
平時讀多啲書，攪清楚來龍去脈先好答問題是很重要的。翻查過成個缸瓦甫嘅規劃史，花 3 分鐘時間了解咗嗰度點樣由過往「超級監獄」走到今日嘅「新疆嶺」，就會更清楚當中個魔鬼細節喺邊：
- 01 年封閉式超級監獄：董建華話香港監獄唔夠位，曾研究用 200 幾億選址喜靈州填海或者缸瓦甫平整成個山頭，起個裝 15,000 人嘅「超級監獄」【註四】；
- 03 年後起唔成消失咗：時任保安局嘅葉劉淑儀事後解釋番，話係深圳嗰邊唔鍾意咁近佢地有個「超級監獄」【註五】，民建聯就話基於保安問題【註六】，最後擱置咗；
- 2010-12 研究起樓：配合著港深邊境開發同搵地，搵咗規劃顧問做個缸瓦甫工程可行性研究，研究中低密度住宅單位嘅可行性【註七】；
- 14 年變重置警察設施：嗰區轉變咗個策略唔用嚟起樓，話平整成個缸瓦甫 19 公頃，會用嚟重置啲北區警察設施集中區，稱為騰空原本啲地出嚟起樓【註八】；規劃署文件解釋，話係因為隔籬新屋嶺嘅練靶場太嘈搬唔到所以唔適合住人【註九】；
- 16 年 7 月交環評報告：透露成個 19 公頃綜合警察設施用地除咗用嚟重置北區警察設施之外，裡面重會額外起新嘅「警察訓練設施」【註十】，用途不明；
- 18 年底去新疆學反恐：李家超話新疆反恐經驗「值得參考」【註十一】，同年初已成立「反恐專責組」，2013-17 年間攪咗大大小小 333 次反恐演習，單係 17 年攪咗 21 次大規模反恐演習【註十二】；
- 19 年 2 月上立法會：「警察訓練設施」個名稱，變咗註明係用嚟反恐（anti-terrorist）嘅新「特別行動訓練設施」（new Specialist Operation Training Facility），放入咗新界東北成個 335 億撥款當中混水摸魚【註十三】；
- 19 年 5 月過立法會：成功拎咗新界東北財委會 19 億基建撥款，可以 11 月開展平整工程【註十四】。
簡單嚟講，魔鬼細節嘅關鍵時間發生咗喺 2014 年之後：先係話要集中化啲警察設施，2016 年就偷偷地加新訓練設施上去，但做環評報告嗰陣又唔提係有反恐功能。連場反恐練兵又考察新疆之後，今年年初就插入個平程土地撥款入新界東北規劃順手拎錢，到嗰陣先輕輕交代咗一句原來個警察設施係用嚟反恐。
成件事政府點解要做到咁偷雞摸狗？大家心照。
成個都係反恐基地無誤
政府話「新疆嶺」唔係反恐基地之後，我地好認真咁重新睇番最新份立法會文件，原文係咁寫：「缸瓦甫用地亦會設置一項新的特別行動訓練設施。這個新的警察設施，以及其他四個將被遷置的現有警察培訓設施，能在警察培訓方面產生協同效應。」【註十五】
攪清楚點解要設施重置同集中化嘅真正理由，就知反恐唔單只係成個「新疆嶺」其中一個功能，而係成個維園咁大嘅巨無霸基地，點解要集中哂所有靶場訓練場設施一齊，就係為咗要同反恐用嘅「特別行動訓練設施」產生「協同效應」，可以令成個場 100% 都變咗同步使用嘅反恐基地。
到時催淚煙、實彈、水炮車、螢光粉、音波炮可以同日萬箭齊發，同場加埋城市模型演習爆屋生擒黃之鋒，當正佢係恐怖分子咁捉一次過，搵埋深圳武警聯合演習都夠哂大。如果訓練設施分散各處，就做唔到協同既效果。到時警暴又可以再進化到另一個層次。
真心想問嘅問題
- 你話唔起「新疆嶺」反恐基地，咁係咪即係可以立即回水 19 億？
- 你話我地失實，係咪即係承認你交去立法會嘅文件失實？
- 2016 年環評報告嗰陣冇提過話要攪反恐訓練，咁係咪應該取消佢平整工程嘅環境許可證中止工程，重新做過環評報告睇下有幾污染？
- 你話唔起「新疆嶺」反恐基地，會唔會又用嚟起番董建華個超級監獄？
唔好意思寫得太長，只係希望有證有據講到俾大家聽「新疆嶺」既真相，請大家繼續幫手傳出去，係阻止香港新疆化關鍵一步，成個基地嘅圖則都劃好哂等緊平整工程開工㗎啦。
參考資料：
【註一】新聞公報：政府澄清有關興建反恐警察基地謠傳 (2019年10月8日)
【註二】新屋嶺已停用 但隔離「新疆嶺」即將啟用！
【註三】立法會PWSC150/18-19(01)號文件 (p.2)
【註四】立法會《監獄發展計劃》CB(2)1023/01-02(04)號文件
【註五】葉劉淑儀，《搬走監獄來建屋──可行嗎？》(2018 年4月3日)
【註六】立法會《民建聯對「監獄發展計劃」的反建議方案 民建聯對「監獄發展計劃」的反建議方案》CB(2)1769/00-01(01)號文件
【註七】立法會會議過程正式紀錄 (2012年2月1日)
【註八】北區區議會討論文件《缸瓦甫用地的擬議發展》(2014年7月21日)
【註九】RNTPC Paper No.2/17 (p.3)
【註十】缸瓦甫警察設施工程研究 – 可行性研究 環境影響評估報告
【註十一】立法會《有關跨部門反恐專責組考察的聯署電郵》CB(2)728/18-19(01)號文件
【註十二】立法會《公眾對恐怖襲擊的應變準備》ISE05/17-18
【註十三】財務委員會 工務小組委員會討論文件PWSC (2 01 8 -1 9) 41 (2019年2月20日)
【註十四】明報：財委會通過新界東北發展逾335億元撥款(2019年5月3日)
【註十五】財務委員會 工務小組委員會討論文件PWSC (2018 -19) 41 (2019年2月20日) (附件4第2頁)
📡 幫你睇實警暴惡法 大大力支持民間研究工作
🧟♂️ 新屋嶺已停用 但隔離「新疆嶺」即將啟用！
🕵️♀️ 新設本研 Telegram Channel 立即追蹤！
本土研究社 Facebook
原文連結
from 港文集 http://hktext.blogspot.com/2019/10/1060.html
