浙江織里大亂：激流中國威脅下嘅香港要思考如何自處
見到織里嘅情況，我覺得香港人要認真思考一吓，出紅海嘅問題。
呢種大亂，只會越嚟越多，越嚟越激，因為地方政府無水問題，中央政府解決唔到。否則中共唔會冒地方政府可以搞軍閥割據之險，都要俾浙江、廣東、深圳、上海發債。呢四個地方有實力貪官最多，有必要果陣，中共默許地方武裝一啲都唔出奇，班友個個要保命，話之你hihi。
呢鋪玩到咁膠，因為唔知邊條地方官中嘅奇人，竟然加一倍衣車稅，啲車衣工人分分鐘被人走緊數，你仲加一倍稅，咁實同你死過喇。大家睇到溫州嘅情況，應該估到分分鐘成個浙江、上海一帶都係呢啲計時炸彈，要爆就爆，如果搞到各地聯動更加亂上亂，呢鋪有安徽佬私運槍枝過去織里，你諗吓。加上西藏近日已經發展到有藏人頂唔住，炸地方政府大樓，即係中共喺西面唔可能減兵力，東西包抄之勢己成，湖北、湖南如果都爆膠事，我都唔知有乜事發生。
香港人如果想走，請依家即度走人計劃，唔想走嘅，就諗一旦中共爆煲，可以點自保，大批中國難民南逃，或者爆發中國內戰，你估講玩。
香港本身己經係激流之勢，依家中國嘅大勢，真係唔慌唔激流中國。
後話：NHK 2007嘅紀錄片，用激流中國命名，以中文而論都準到極，當仲喺上游好多人都唔知死字點寫，依家睇嚟就嚟去到瀑布，日本仔一早睇到有幾大劑。如果依家你仲未知中國嘅大鑊來源，可以先睇NHK嘅激流中國系列，了解「中國政治激流水文圖」。
from MO's notebook 3.75G: http://blog.martinoei.com/2011/10/%e6%b5%99%e6%b1%9f%e7%b9%94%e9%87%8c%e5%a4%a7%e4%ba%82/?utm_source=feedburner&utm_medium=feed&utm_campaign=Feed%3A+MosNotebook375g+%28MO%27s+notebook+3.75G%29
