一年前嘅今晚，警方圍封理大所有出入口，指所有離開嘅人都會被以暴動罪拘捕。
最後，810 人從理大離開被以暴動罪拘捕，318 人被登記資料。假設成功逃出圍困嘅係少數，紅磚牆內被圍困嘅手足，不過二千人。
11 月 18 號晚，被稱為「最接近全民勇武嘅嗰個夜晚」，據估計過十萬香港人為救手足，從油尖旺各區出發，望住紅磚牆奮戰整夜。呢十萬人中，好多人都跨過咗心理關口，係前所未有咁勇敢：有唔少和理非第一次義無反顧走到前線，攞起一把遮上前抵擋催淚彈。
十萬人，全民勇武。
如果呢十萬勇敢嘅人，早啲出現，歷史嘅軌跡會唔會有所改變？
殺出重圍，除咗需要體能，更加需要勇氣、需要希望。記得我曾經喺直播中目擊抗爭者大嗌「暗語」：「我想打波有冇人跟隊！」，然後萬眾一心回嗌嘅一句「有！」，令佢地相信有擊退警察防線嘅機會，為佢地賦予咗無限嘅勇氣，然後佢地就有力量戰鬥下去。偏偏紅磚牆內，手足面對嘅挑戰，唔止係連場硬仗帶嚟嘅筋竭力疲，更加係精神嘅折磨，士氣嘅重挫。
記得《理大圍城》中，手足有一句「我地就係得返呢度咁多人」。
二百萬同路人中，只有佢地千幾二千人企咗喺 A Core 與 Z Core 中間呢個空間。佢地望住身邊唔多嘅人，慨歎一句，「得返咁多」，就只有更加氣餒更加沮喪。儘管仍然有人，冒死一戰、嘗試，但牆內嘅士氣、信心、氛圍，始終俾唔到佢地勇氣同希望，可以一鼓作氣殺到出嚟，結果只有每況愈下。
如果 18 號晚嘅十萬人，有一半，喺 17 號日頭理大開戰嘅時候，就馬上齊上齊落，趕到理大救援。牆內唔係只有千幾人，而係一直都有六千人，呢五倍嘅人數，會唔會帶嚟改變？
據事後收到嘅消息／傳言，17 號深夜至 18 號清晨，圍城嘅開端，警方一直按兵不動，唔係因為佢地「極度克制」，而係因為佢地當晚補給困難，彈藥嚴重不足。
如果 18 號晚嘅十萬人，喺 17 號晚就第一時間出發行動救人，情況會唔會唔同？
偏偏現實係，18 號清晨，警方強攻，速龍一度攻上 A Core 樓梯，拘捕一批人；18 號朝早，部份理大手足等唔到援兵，先行嘗試自行突圍，又有一批人被捕。到咗 18 號晚上，香港人醒覺，先出現十萬人反包圍救人嘅一幕；但嗰時，警方嘅補給鏈已經重新建立好，牆內嘅手足士氣亦遠比早前低落、迷惘、猶疑，人數亦更少，再冇能力嘗試突圍會合出面嘅手足了。（有機會嘅，睇下《理大圍城》，會更加了解牆內佢地面對嘅絕望，同士氣嘅崩塌。）
香港人，總係有 deadline fight 嘅特質。當我地被迫到埋牆角嘅時候，我地會反抗；所以當警察上演非人道圍城記時候，無數香港人都再「進化」，做到「最接近全民勇武」一日，去對抗警暴。但偏偏，原來有時候，等到最水深火熱嘅時候先全力反抗，就已經係太遲，可能就係爭嗰一日，17 號同 18 號嘅距離，就係理大一役慘敗主要原因之一。
又如果，7.1 重奪立法會嗰日，香港人有 10 月、11 月嘅堅決同勇氣，學梁繼平講咁，有足夠嘅人數嚟到金鐘守住立法會，上演香港嘅太陽花運動，歷史又會點改變？
我唔係想抱怨邊啲人冇早啲出嚟。始終 18 號晚，唔少反包圍嘅手足，都一早付出咗好多好多，只係咁啱 17 號冇走入理大入面幫手，而即使喺 18 號晚先決定行前多步，佢地嘅勇氣同付出依然值得喺香港歷史上百世傳頌。更加唔好講外圍亦有多達五百人被捕，其中二百人被控。
只係，我地永遠可以走多一步，早走一步。
過去嘅事我地已經冇辦法改變。2019 年嘅抗爭運動，終究未竟全功而終；理大圍城一戰，終究係最慘烈嘅一場敗仗，過 500 人喺外圍被捕，而牆內大部份人千幾人都逃唔出圍困。
一年後嘅今日，我地就更加要以此為鑑。未來香港會唔會再有大規模嘅民主運動，無人知曉。但如果我地喺未來再有一次機會，喺時代嘅呼召之下，可以選擇挺身以出爭取我地嘅未來，我地唔會再留待最後一日先學會勇敢，我地一定會再早一步，行出嚟同身邊戰友同行。無論你 2019 年有冇行過出嚟，幾時決定行出嚟；到下一次，希望見到你。
未來嘅嗰一日，十萬人，二百萬人，七百萬人，比 2019 年更勇敢、更堅決、更義無反顧，我地就會贏佢老母。我是如此相信的。
在此之前，坐直、飲水、做運動、讀好書、照顧好自己。2019 年又好，11 月又好，喺我地好多人心中不能磨滅嘅創傷；儘管難過，我們仍會一同走過，唔好死。
作者 Facebook
from 立場新聞 Stand News https://thestandnews.com/politics/%E5%A6%82%E6%9E%9C%E6%9C%89%E4%B8%8B%E6%AC%A1-%E6%88%91%E5%9C%B0%E5%94%94%E6%9C%83%E5%86%8D%E7%AD%89%E5%88%B0%E6%9C%80%E5%BE%8C%E4%B8%80%E6%97%A5%E5%85%88%E5%87%BA%E5%9A%9F-%E5%8F%AF%E4%BB%A5%E5%98%9B/
