在過去一年眾多被DQ人物中，最關鍵的是梁振英。他任內五年能人所不能，將整個建制搞到四分五裂，起用一班非主流「騎呢怪」：高靜芝、馮煒光、新社聯、愛字頭、大媽、新界西社團，令主流建制避之則吉，亦唔想同梁振英走得太埋，而工商界、自由黨因被指控為唐營而冷待，於是形成一個左傾強硬的少數派政府，四處點火頭，北京好多想推的agenda，因為梁粉政府「四方樹敵硂八面威風」而無法出台。梁振英政治後台張德江交權，由習系人馬栗戰書接班，並出任中央港澳協調小組組長一職，取代張德江成為香港事務揸fit人，特區整個玩法已有改變。
新社聯、新西社團、愛字頭、周融一棚梁粉系人馬已經淡出，而傳統建制派會以北京為中心作整頓及指揮，修改議事規則是考牌作，上邊由張曉明吹雞，下邊由林鄭月娥、立會主席「大口狗」、建制派李慧琼做核心，用回傳統建制勢力執行，黑幫、新界佬、周融及深圳大媽全部彈開，由共產黨官員指揮，定下死線要聖誕節前通過，為明年一地兩檢及國歌法上場掃清障礙。於是大家見到表面上林鄭保持距離，置身事外，但其實政府全面配合停止向立法會提交議案，以免被泛民乘機拉布阻礙聖誕節前完成修訂。其他政府官員一概低調，扮唔關政府事。至於昔日被排擠的本地工商界就更加打陣，梁君彥將所有修正案合併辯論，目的亦係要聖誕節前表決，不容有失。
今次係九七《基本法》生效後，第一次全面將議會削權，如此重大政治事件，市民反應十分冷漠。建制派以反拉布為名，是爭取到中間民意，因為拉布方式，本是非到危急關頭不能用的「七傷拳」，但過去幾年個別激進派總之反對就拉布，因而失去部份中間民意。第二個不利因素係同林鄭有關，佢比689手段高明得多，不會輕易挑機，口出惡言，適當時候在無關重要的問題上擺出一副「非傀儡」模樣，例如兩會期間進行311補選受李慧琼批評。林鄭主力爭取中間民意，收編專業團體、文化、保育界，大家試諗一諗，來港出席四城文化交流會議的台灣文化人張鐵志被拒入境，主辦單位進念完全唔出聲，文化界視若無睹，林鄭、劉江華繼續做主禮嘉賓，不作回應，大家就當冇件事，幾恐怖。如果係689年代，早就俾文化界鬧爆。
DQ梁振英，利用政治上鐘擺效應，再全力推進強硬政策，由北京牽頭，共黨官員亮劍，林鄭低調配合，將成事不足壞事有餘的梁粉系收埋，呢種玩法已見成效。泛民在對方變陣後，冇相應改變，一味諗住議會抗爭，阻止修訂在聖誕節前通過。其實泛民最大敵人，不是建制派，而是冷漠的群眾，令建制派付出政治代價，就要將大白象千億工程超支、單程證爆錶、超貴東江水、貧富懸殊等民生議題，同議會監察權拉上關係，並簡化修改規則政治後果向市民宣傳：畀市民知道2018年梁君彥、李慧琼將會惡晒，可以濫權，立法會內惡霸橫行，政府官員肆無忌憚，共產黨則予取予攜，長驅直入。如果在有限時間內無法動員民意，只局限於議會內作象徵式抗爭，立法會自1991年以來作為香港人民意代表監督政府之角色，壽終正寢！
立法會都死咗，補選爭嚟做乜呢？
刊於蘋果日報
原文連結
from 港文集 http://hktext.blogspot.com/2017/12/731.html
