有啲嘢香港人要諗諗。
澳門起一大堆賭場，但係社區設施落後；香港起一大堆大白象基建「接通全國」，但係本地交通一潭死水，起港珠澳大橋，但係連電子道路收費都無，青嶼幹線收錢都可以半個香港塞車。
澳門經濟來源單一，其他嘢落後不堪，但係數字上一切都好好，年年有錢派；香港愈黎愈靠金融業，睇落繁榮穩定，但係住屋、醫療、教育全部都搞唔掂。
好多事嘅苗頭已經出現咗。
更嚴重係，澳門官員政府只係分餅仔，大家有錢齊齊搵；香港呢，張震遠、梁振英，甚至陳章萍，大權小權，只要有權就有錢齊齊搵。
仲有過份依靠大陸都係問題，澳門因為八成供電來自大陸，無電就變死城；香港都向呢條路走緊，而問題根源係，大陸好多嘢都靠唔住。
最後想講，澳門一直無公民力量，無人反對無人搞事，社會和諧中央都讚好，仲叫香港學習。事實係，搞亂搞壞一個地方，從來都唔係無權無勢嘅反對派，而係政府。
希望澳門居民早日脫困，死難者安息。
（標題為編輯所擬；原刊於作者 facebook）
原文連結
