（獨媒報導）前全國政協委員何柱國日前接受陶傑訪問，重提2019年反修例事件，指在當局推出《逃犯條例》修訂前，曾先後向時任行政長官林鄭月娥、政務司司長李家超勸諫，不然將引來美國制裁，但二人並未接納。他更透露曾在馬會咖啡店內，向李家超解釋修例的後果，但對方「連制裁佢都唔係幾明」：「我知道，因為連林鄭月娥都唔係幾明，佢係一個專門管保安嘅，佢唔係做生意佢唔會聽得明，但我亦都解釋過俾佢聽。」
何柱國周三（16日）出席商台節目《光明頂》，接受陶傑越洋訪問。何柱國稱早前曾到歐美多地旅遊，稱美國經濟很好，其經濟數據及股票均反映向上：「真係唔錯㗎美國，我去到美國度度都好好，一定好過香港！」
何柱國：本港現今形勢受天災人禍所致 難再有夜市
財政司司長陳茂波早前建議在短期內搞旺夜市，鞏固復甦經濟環節。何柱國就認為香港本來是好好生活、好好完美的地方，能夠享受一國兩制的優勢，卻先後受2014年佔中、2019年反修例影響：「林鄭月娥搞嗰個呢，係咪叫反修例呀？整咗一班就上咗鬼佬當，整咗一班嘅黑衣人出嚟，搞到香港亂咗！由嗰時邊度夜市呀，晚晚通街都係警察，跟住又COVID，個夜市自然消失㗎啦。」
何柱國形容，香港今日的形勢受天災、人禍所致，難以再有夜市：「我覺得疫情算係天災啦，人禍咪走返去林鄭月娥囉。」他透露曾向林鄭親自解釋：「你如果去搞反修例呢個嘢，你會引到美國嚟制裁香港。」
螢幕截圖 2019-06-12 下午8.24.15
前行政長官林鄭月娥（資料圖片）
李家超管保安不識生意 倡發展醫療、教育取代零售業
除了林鄭月娥，何柱國稱同曾向時任政務司司長李家超解釋：「我親口亦都同李家超，兩個人喺馬會個coffee shop。我同佢講，呢單嘢你勸吓阿太，唔好去做。因為你將來會影響香港同美國嘅交易世界most favoured nation 個度，會得出問題，人哋可以制裁你㗎。李家超連制裁嗰時，佢都唔係幾明。我話佢制裁你多，高科技乜嘢都可以，到時影響到大陸㗎，因為好多高科技都係香港入大陸㗎嘛。我解釋得俾佢好清楚，但係佢唔係幾明。我知道。因為連林鄭月娥都唔係幾明，佢係一個專門管保安嘅，佢唔係做生意佢唔會得明，但我亦都解釋過俾佢聽。」
李家超去年上任行政長官，何柱國繼續爆料，稱早前曾向對方稱，內地及本港經濟均下行：「毋需要諗住將來要靠國內嚟支持香港，因為大家⋯⋯世界唔同咗，將來COVID之後都唔知點。香港向來靠三支柱撐住，旅遊、財經同埋嗰個零售，我話唔好寄望喺零售上面，將來嘅零售呢係唔會得好，因為國內已冚冚聲谷緊海南島嘅free port，將來可能平過香港。」
何柱國稱曾向李家超建議，本港可效法外國，發展成世界醫療中心，吸引國外、東南亞人來港，從而帶動不同生意，如美國、英國、瑞士及韓國，並由政府帶頭對外宣傳，相信可以支撐本港部分經濟。除了醫療，何柱國認為本港亦應發展教育，以學校長處吸引多學生來港就讀：「又要住又要食，父母嚟探佢，將來踎喺度，住喺香港謀生又得，你又吸收人才，何樂而不為呢？」
另外，何柱國亦建議取消股票印花稅，在「搶人才」的時候應撤銷「辣招」即住宅物業印花稅：「佢哋咪喺香港置業，你咪支持香港樓市囉！」他斷言財政司司長陳茂波遲早要撤銷「辣招」，因為地產屬香港主要行業，如市道不景便有不少人失業。
無標題
行政長官李家超（資料圖片）
批陳茂波唔識經濟 促立即取消樓市「辣招」
何柱國更反問：「陳茂波識唔識經濟㗎？佢會計師出身，佢唔識經濟！我嗰日問李家超，你識唔識經濟，佢話我唔識㗎，我唔識經濟！咁你就多聽啲人講，你exco（行政會議）裡面有咁多人才，你可以聽吓佢講法，但係有樣嘢！你唔好聽律師講！如果嗰個做律師嘅，你唔好聽佢講，做會計師你唔好聽佢講，做醫生你唔好聽佢講，呢三類人係唔識經濟唔識賺錢，淨係得把口講。」他直指該三類人做投資最差，並不懂做生意。
在節目中，何柱國多次批評陳茂波，並喚對方應立即取消樓市「辣招」，並指本港絕不應開徵銷售稅：「快啲諗吓鞏固返自己，自強最緊要，唔好等天嚟打救你。」他建議當局多向行會成員「求助」，包括來自商界的林健鋒，及匯豐非執行主席王冬勝等有水平的人：「自己二打六唔夠，就去問吓識嘅人啦！要求救㗎！坐喺度卸住寫blog 無用㗎，日日寫！」
陶傑及後提到，林鄭、李家超一直被律師、醫生包圍，建議改組內閣。 何柱國就借題發揮，稱有部份律師十分醒目：「戴耀廷嗰啲傻仔就做副教授，嗰啲害人子弟，個個累到坐監。但係你睇吓，李柱銘有冇呀？余若薇有冇呀？陳淑莊有冇呀？人哋呢啲先夠水平，知道點保護自己，你班傻仔去跳海啦，佢宜家䟴䟴腳，因為佢知法律點走，呢啲先係叻人嚟，我好佩服佢哋！」
from https://www.inmediahk.net/node/%E6%94%BF%E7%B6%93/%E4%BD%95%E6%9F%B1%E5%9C%8B%EF%BC%9A%E6%9B%BE%E5%96%9A%E6%9D%8E%E5%AE%B6%E8%B6%85%E5%8B%B8%E6%9E%97%E9%84%AD%E5%8B%BF%E6%8E%A8%E4%BF%AE%E4%BE%8B-%E3%80%8C%E9%80%A3%E5%88%B6%E8%A3%81%E4%BD%A2%E9%83%BD%E5%94%94%E4%BF%82%E5%B9%BE%E6%98%8E%E3%80%8D
