拉一派打一派在共產黨歷史上出現得很多次
今次放寬物業按揭到800萬90%，1000萬80%，最癲係唔夠入息比率過唔到壓測都可以加保費再借足80%/90%
此舉不外乎幾個重點：
1. 以前中產話我搵60000一個月，一家人搵10-15萬都買唔起601萬樓，因為儲唔到240萬，儲到又只可以買沙一，花園城300幾呎，實在唔係咁符合收入及使用。呢家俾你80萬首期買間800萬似樣的2房，又或者1000萬大兩房/細三房，供就一定供得起，不過係用盡一生人的能力及收入出超必去做呢件事。將中產的購買力完完全全的搾盡。
2. 買左樓之後，你定必唔想佢跌，你更不會出來示威，拉左你連份工都無，點供樓? 達到最強的統戰手段，有樓的務必要你做順民，特別係新買樓的一群，過去係極度怨氣重 (可能今日過後更加重)，呢家迫你去入場。
3. 分化 - 其實好多支持呢場運動的都係中產，劉細良話齋，好多中產捐錢又做校巴司機去支持呢場運動。今次拉哂有資產的一方與政府所謂的NON STAKEHOLDER 對立。鼓勵大家歌舞昇平。
4. 加快移民 - 相信大家都記得林鄭同市民對話時，有一個人話相信有小朋友的90%以上都諗緊移民，呢家出台暴力托市，就係等你班人再多D子彈，沽野走人。加按總有個限額，最實在係沽野走人，抬高個價俾你沽。
5. 夾升物價，趕走新生代 - 呢點其實好痛，我唔想寫，其實抬高樓價無異於威脅新一代，叫佢地出走香港，因為連最基本人權的住房都係痴綫地貴的時候，捨難取易，必定係出走他方。達到加快殖民之效。中國EXPAT 住係中聯辦的宿舍都OK，其實唔駛買樓的。
有D人話，小子，你有樓應該爽YY，其實你諗深一層，富不過三代，我們的下一代會係點樣？我死左咩都帶唔走，同埋比我有錢的人，大有人在，以前見過高管個仔住會景閣，星街等等，係10年前的會景閣，他們一早在香港布好局，其實是沒有可比性的。
寫出時代巨輪(中聯辦大手買新樓，一葉知秋) 同埋心中所認為的是筆者寫野的初心，條PK小子叫人買樓，講真，我無錢收的，怕就係怕好似今日咁，其實好多人今日都措手不及，明明死儲爛儲儲到100幾十萬，俾佢個PK 政策咁攪一攪，又送左俾發展商/(無良)業主。我相信時間推遲30年，50年，80年，未必有人可以笑到最後的，一招回血劍便可以GG，例如土地收回條例。
香港的宿命，始終離不開磚本位，政治問題用房屋解決，呢個定性係呀爺一早吹風講左，作為現世的香港人真係實在有一點無奈。
莫道她是斷錯症，她是ON PURPOSE的。
from 快活谷小子財自之路 http://happyvalleyjockey.blogspot.com/2019/10/blog-post_16.html
