醬園紥根香港百年 11 月起豉油轉貼中國製標籤 第四代誓保家業歷史

元朗一個醬園，1928 年來堅持在香港天然生曬豉油，在包裝上印着「香港製造」，對於他們來說，並非特意標榜，而是理所當然的標示。然而，他們近日一度停止生產線，只為配合美國的新法規，忙着將出口美國的醬料上印有「香港製造」的字眼都蓋着，改為貼上「中國製造」的標籤 — 92 年老牌醬園始終被淹沒於中美貿易戰的暗湧。

美國早前取消香港特殊待遇地位，8 月宣布，9 月 25 日起，所有港產品須標示原產地為中國，其後華府將規定推遲至 11 月 9 日實施，「香港製造」將絕迹美國。改了標籤，改不掉港味，這間醬園配方始終如一，更保留在香港再無人使用的「殖民時期醬料」，醬園第四代傳人 Daniel 立志承傳家業，將醬園歷史宣揚開去，近百年光景濃縮在一樽豉油，尤如香港一本活生生的歷史書。

甫踏入冠珍醬園位於元朗的廠房，黃豆香撲鼻，再進入眼簾的是數十個金屬製曬池，雖然醬園創立於 1928 年，但製作現已十分工業化，53 年前由九龍城搬到現址後一段短時間後，已棄用瓦缸曬黃豆，以應付製造豉油和廣東傳統醬料的大量訂單。

冠珍第四代傳人 Daniel 帶記者走一遍生產線，最後走到出車場，卻看見工人將包裝好的醬料拆箱再裝嵌。原來，因應美國政府要求，工人正將原本印有「香港製造」的包裝拆掉，改為寫上「中國製造」。一邊生產線的工人用牛皮膠紙蓋着紙箱上「香港製造 Made in Hong Kong」的藍字，另一邊則負責貼上「Made in China」的貼紙，還有工人專門負責鐵罐包裝，純熟的將鐵罐前後的「香港製造」標誌用「Made in China」貼紙蓋上。一種產品的製造地就是如此改寫。

員工心痛產品改標中國製

Daniel 表示，醬園近一半生意都是出口美國，加上訂單一般會在付運前半年開始製作，因此政策一出，工廠已來不及訂製新的包裝，只好人手逐一加貼標籤。長遠而言，Daniel 嘆產品從此會失去獨特性，「當地超級市場都有幾樽係中國製造嘅時候，我哋只不過係其中之一，會唔會有啲不良嘅效果，影響到佢哋嘅 decision 去買我哋嘅產品呢？我覺得會有影響。」他又說，醬園一眾前線員工比他更難受，「大家睇住呢啲產品出世，但要將自己嘅親生骨肉貼上貼紙⋯⋯親手遮住香港製造嘅嗰種感覺。」

非洲島民也用豉油

這間本土老字號其實創立近百年以來，都是以外銷為主，Daniel 解釋香港早期有 40、50 間豉油廠，本地難以消化所有產品，所以外銷是當時不少豉油廠的主要收入來源，又因為 Daniel 的太爺清末時期在巴拿馬一帶做生意，累積了一定人脈，所以國外的客戶主要集中在美洲一帶。

至 50 年代韓戰爆發，各國對中國實施禁運，香港當時作為英國殖民地，因而從轉口港發展為製造業中心，用外來原材料製造產品再轉口出去。Daniel 表示，醬園亦由當時開始轉用加拿大黃豆，「其實都幾得意，加拿大運黃豆過嚟整成豉油，之後又運番去加拿大。」

發展至 70 年代，連非洲法屬小島留尼旺都有購入冠珍的產品，「亦都突顯咗香港咁多年嚟，唔係講緊呢十幾廿年，而係呢一百年來每代人嘅努力。」

文化輸出上珠油

殖民地時期衍生而來的，還有一種名為上珠油的醬料，至今只得香港三間醬園仍有生產，冠珍是其中之一。上珠油的主要成份是糖蜜（白糖副產品）和豉油，凋杰而深咖色的醬料主要是用來為乳豬上色，不過本地燒臘師傅早已棄用，反而歐美等地的唐人街仍然使用這個傳統造法。Daniel 說，「要了解到外國嘅唐人街係有一種時光倒流嘅感覺，70、80年代移民去嗰邊嘅人，就一直用咁傳統嘅嘢，所以我哋都會繼續供應呢樣香港咁特別嘅產品畀佢哋。」

「香港文化其實有好多已經輸出外國，反而外國仲保存得好啲𠻹，我覺得要將呢啲嘢聯繫起來﹐先可以繼續讓下一代保存香港這個獨特的文化。呢樣亦都係飲食文化，係香港人 identity 嘅一部分。」因此冠珍除了保留生產上珠油，其他醬料配方亦始終如一，原汁原味呈現 92 年前的風味。

Daniel 碩士畢業於哈佛大學亞太研究，介紹醬園歷史時總是滔滔不絕。他指自己五年前接手家業時十分迷茫，「我又唔識造豉油，又對醬料零知識，連包裝、船運都唔識，咁我返嚟又點幫佢哋呢？」於是他便決定運用自己學術上的知識，重整醬園的歷史，除了翻查公司的舊資料，更走訪不同老醬園做資料搜集，「始終上一輩係生意人，好少將歷史周圍同人講，好彩佢哋只係將啲嘢放晒喺櫃筒底，無掉晒佢。」

他自言少時對醬園沒深厚感情，在美國生活時也甚少煮中菜，「只會當係阿爺嘅一盤生意，唔會當係一種文化同資產。」直至接手之後，才發現醬油世界之大，懂得欣賞當中的文化，「越學就越覺得仲有很多嘢可以繼續學習，包括喺老師傅、客戶同原材料供應商，前幾年我突登飛去加拿大睇下啲黃豆係點種出嚟，喺呢啲細節搵到自己嘅滿足感同意義。」Daniel 現時主力對外推廣和宣傳事務，周末不時都會帶導賞團介紹醬園歷史和豉油的生產過程，「咁特別嘅嘢我覺得要發揚光大，我想話畀人聽香港係有呢啲傳統文化，而我哋仲可以保存。」

記者/ 鄧可盈
攝影/ Fred Cheung、劉子康
剪接/ Fred Cheung

from 立場新聞 Stand News http://thestandnews.com/society/%E9%86%AC%E5%9C%92%E7%B4%A5%E6%A0%B9%E9%A6%99%E6%B8%AF%E7%99%BE%E5%B9%B4-11-%E6%9C%88%E8%B5%B7%E9%BC%93%E6%B2%B9%E8%BD%89%E8%B2%BC%E4%B8%AD%E5%9C%8B%E8%A3%BD%E6%A8%99%E7%B1%A4-%E7%AC%AC%E5%9B%9B%E4%BB%A3%E8%AA%93%E4%BF%9D%E5%AE%B6%E6%A5%AD%E6%AD%B7%E5%8F%B2/