尖碼巴總 vs 露天廣場 vs 交通博物館
拆卸尖沙咀碼頭巴士總站改建露天廣場的計劃經過2009同2010年兩次刊憲, 關注組織尖碼之聲動員公眾反對, 向政府先後提交了合共接近20,000封反對意見書後, 政府仍然死心不息的想推行計劃。先在今年6月向油尖旺區議會提交新計劃建議, 在民建聯加西九新動力控制之下通過支持動議。政府於是就貿貿然的在9月9日刊憲, 咨詢期11月8日結束。
政府今次的方案除咗因為未能採用設計比賽的得獎作品而遭到建築師學會炮轟之外, 更是尖碼之聲方面表明會再三發動市民提出反對、要求撤回拆站計劃。
佢地指出這個方案存在多項問題, 包括：
1. 摧毀巴士總站的原有的景貎。古咨會評級仍未公佈, 提出拆站計劃有如「先斬後奏」
2. 落客處及個別路線上客位設於文化中心外, 遠離現有總站範圍, 對市民構成不便
3. 即使將文化中心外的空間納入計算, 但都不足以容納現有的所有巴士服務的車流需要
4. 的士站設於馬路中心, 對乘客上落車 (尤其是3名以上乘客需使用車頭座位的話) 構成危險
5. 的士落客點位置在上客點之前, 的士無法即時重新上客, 既影響乘客候車, 又影響的士司機生計
6. 露天廣場根本沒有「有助旅遊業發展」的實質理據, 新方案下廣場面積細得如「休憩處」, 更加無謂
7. 建議擺放古董巴士和古董火車卡, 不單毫無意義, 臨海擺放即是讓海風將巴士和火車卡進行「凌遲處死」
在下了解過之後得出的結論就係, 政府明知不可為而為之!
但今次刊憲期正正踩住區議會選舉, 政府睇嚟都真係幾會計算時間：
今次佢哋嘅「抗爭」睇怕都唔駛點見報, 因為傳媒的採訪焦點一定去晒區議會選舉
而且「尖碼巴總」呢個議題一來拖得太耐 (2003年到依家), 二來缺乏「衝突」場面而見報率唔高、電視台更近乎絕跡, 市民的認知程度真係好低。
尋日《蘋果日報》有報導佢地再一次以「一人一信」簽署反對意見書的方式再次揭開抗爭, 成果會是如何真係唔敢想像。因為在下認為「又簽呀」會成為一大障礙。
所以尖沙咀碼頭巴士總站絕對可以話係一個極度大的危機。
對於佢地今次提出的反對理據, 當中的2-5都同民生有直接關係, 在下希望能成為動員市民的最大力量
只是話說回頭, 撇除之前提過比較陰謀論的觀點, 政府的計劃係想改建一個能有助旅遊業發展的露天廣場
但係「海外遊客會否因為呢個露天廣場而選擇嚟香港?」呢條問題, 在下搵唔到資料記載政府點樣實質回應
但就搵到尖碼之聲佢地曾經引用北京天安門、上海外灘作出比較, 指出露天廣場一定輸硬
在下想了想就非常認同。因為的而且確, 遊客會因為打算去天安門睇升旗、甚至憑弔8964而去北京；會打算去欣賞外灘的古建築群而去上海。
遊客會為要去「尖沙咀露天廣場」而嚟香港旅遊呢?
在下之前有提過會有遊客會對「雙層巴士」慕名而來, 更試過幾次遇上唔知係韓國定日本遊客, 成團十幾人响尖碼上九巴, 然後去到旺角落車。
在下又諗諗下：係喎, 亞洲區要試下坐雙層巴士, 真係得香港或者新加坡
(大陸係有, 但你作為異地人識唔識坐, 或者敢唔敢坐吖)
在下真係好夠膽講, 政府真係唔識搞旅遊業就死埋一二角啦, 連一個咁嘅旅遊項目响手上唔去好好推廣之餘, 仲要掉返轉拆咗佢。
即係話, 尖碼巴總 VS 露天廣場, 1:0
响政府6月份提出新計劃嘅時候, 其中一項建議係以「交通文化」為主題去建設個露天廣場, 其中一個安排就係擺放古董火車卡同古董巴士。
尖碼之聲用「凌遲處死」真係一針見血, 亦都再一次反映咗政府官員真係無腦至極點。原因連中學生都會明嘅道理, 唔駛解釋啦!!!
但香港官場荒謬事沒有最膠, 只有更膠, 所講嘅係架古董巴士應該係「行得走得」的
政府唔單止要佢就咁擺响海邊算數, 在下更打探到政府想好似「保護」曾灶財咁, 即係將下圖的1:150的巴士模放大150倍
呢啲叫「體驗交通文化」?? 真係「乞膠都唔駛咁吖」
亦都充份反映班政府官員對旅遊業的概念, 停留喺大陸人的「拍照留念, 到此一遊」的思維
唔怪得田北俊劑劑走出嚟公佈遊客數字時都話大陸客佔咗最大升幅啦
在下之前提過, 英國倫敦交通博物館收藏咗唔少巴士、鐵路同埋與公共交通有關的展品, 2008-09年度就招待咗接近300,000人次訪客。要擺放一架古董巴士俾遊客「體驗交通文化」, 就應該參考呢個做法。
再者, 在下向「中華巴士紀念館網站」 的網主和其他友好了解過, 香港現時私人保留咗接近60部不同年代的古董巴士, 但除了以下呢一部由中巴在1970年代復修的之外
 |
| 1949年出廠的古董中巴 - Tilling Stevens K5LA7 於1960年代後期退役, 當年任中巴車務總監 (城巴創辦人) 李日新先生在1970年代斥資復修, 之後一直保留至今, 並得到運輸署發出牌照, 可以合法的繼續行走。當然同樣需要根據法例每年驗車後才可續牌。 |
其餘的都係响新界出邊「吽草」。即使有資金將巴士復修好, 都只能讓巴士繼續受風吹雨打、日晒雨淋。
更攞命的是, 政府不單沒有提供資源, 更是對這班有心人作徹底封殺 ── 下令巴士公司一定要保證退役車輛無可能再响香港路面出現。
在下有了解過, 曾經有購入退役巴士的巴士迷, 駕駛架巴士出街甚至載客。這類非法、危害乘客安全的行為當然要杜絕。這些行為都係基於不少「巴士迷」有著「揸住架巴士出街就巧威威」嘅不良心態, 但政府一直沒有對交通文化歷史保育做過任何事情而只係識得「禁」, 咁同啲被罵「為反而反」嘅政客、激進份子有乜分別?!
倫敦交通博物館更會協助當地保留舊巴士的車主復修、貯放和保養, 並且肩負起交通文人心歷史保育的教育工作。即係話交通博物館既能提供一個比起尖碼海旁更優勝的場地擺放古董巴士(甚至火車卡), 並能為保留起舊巴士的車主提供資源, 更能對交通文化歷史保育進行教育, 而且有可能成為倫敦交通博物館之外另一個聞名的博物館, 真正幫助旅遊業發展。
即係話, 露天廣場 vs 交通博物館 係0:1
大總結一句：露天廣場絕對係一個廢到無輪嘅計劃
當年提出計劃嘅鄭汝樺唔該嘔返做旅遊事務專員時嘅人工出嚟!!!!
後記：
如果政府仲堅持想起「露天廣場」, 不如考慮尖碼之聲嘅建議, 改去紅磡灣海旁
不過, 在下再作思量, 可能在紅磡灣將「荔園」或「啟德遊樂場」復活, 可能更有效果
延伸閱讀
呢啲叫香港情, Completely Rubbish
星光大道, 自取其辱
尖沙咀廣場設計被廢, 唔好賴人
交通歷史保育, 其實可以做得好好
香港的旅遊業要點做, 人地俾晒IDEA 架啦
返回主頁
on 巴士佬 - 揸巴士?: http://robustorlo.blogspot.com/2011/09/vs-vs.html
