（獨媒報導）首宗國安法案件審結，唐英傑因「煽動分裂國家」以及「恐怖活動」罪成被判囚9年。不經不覺，國安法庭在香港運作超過一年，不時都有新衝擊，本網找來幾位一直關注唐英傑案的法律人，談談司法界經歷「新體驗」後有何感受。A君擔心出現「加控潮」，以往被捕人士若搜到物品「有能力（capable of）」，隨時被加控「煽動分裂國家」。B君較「樂觀」，指「光時」未必成禁語，歸根法庭仍要就有否意圖煽動做事實裁決，「紅線」似乎沒有退。C君半開玩笑，指以後不敢叫「We are Hong Kong」，要叫「We are Chinese Hong Kong」，免得招人話柄，要將香港從中國分裂出去。本來還有D君，不過對方婉拒受訪，「費事講多錯多」。
（為保護受訪者身份，以匿名方式處理。訪問個別進行，為方便閱讀而整合。）
問：唐英傑案，法庭似乎無特別處理辯方專家證供，有無問題？
A：呢方面都係整件案件中，我覺得一個幾可怕、具摧毀性但又無可避免嘅觀察。辯方專家證人花咗長時間去闡述「光時」八字可以有多於一個解釋，呢個正正係「疑點」。退一步講，即使八字真係capable of煽動分裂國家，但唐英傑展示旗幟時，係咪不能排除佢展示枝旗時，係想表達除咗分裂國家嘅意思？ 以往「疑點利益歸被告」，而家就變咗「疑點利益變證據」。成單案，我覺得控方係未能夠「毫無合理疑點舉證proof beyond reasonable doubt」，似乎條線唔同咗，都幾心寒。
B：衰啲咁講，其實呢單案根本唔需要專家證供。主要議題係「光時」口號造成嘅自然及合理效果（natural and reasonable)，係咪能夠煽動他人分裂國家。我相信呢兩年喺香港生活嘅人，都會知道呢八個字係可以有分裂國家嘅意思，呢個唔需要爭辯。其實連辯方專家都同意，「光時」能夠帶有呢個意思。至於佢（唐）展示時有無意圖，呢個其實都係法庭事實裁決。
問：唐英傑案對往後案件影響？有無參考價值
A：入罪個標準清晰咗好多囉，你有一啲物品，原來capable of煽動分裂國家，然後法庭又對警方證供全盤接納，甚至稱喻警方做「law and order（法治）」嘅化身。喂一定㗎咩？我諗由國安法庭三位法官去「肯定」警方嘅權威，往後警方對國安法執法，只會更肆無忌憚。
（會唔會預期出現追溯潮、加控潮？）
A：一定會有。之前有啲案件，拘捕時身上搜到「光時」字樣嘅野，印象中有一單food panda外賣員銀包有「光時」卡片，加控一啲都唔出奇。
C：都預期出現，律政司好多嘢可以試囉，開咗度floodgate（閘）。你都估到架，例如理大暴動案，會唔會話佢哋既行為係「恐怖活動」，為實現其政治主張而作出暴力行為，脅迫中央政府吖嘛。舊年7.1拉咗十幾廿個，有人叫口號，有人手機殼有「光時」字樣，喺律政司角度，呢啲實可以告架。甚至區議員議辦啲擺設……太多。（國安法無追溯期？）邊度講架，你講國安法邊條文有寫「無追溯期」，我睇唔到。
B：唐英傑案裁決對往後無咩參考價值，因為唐英傑個案情好獨特，佢展示方式唔同一般人。同咪，每單案案情都要獨立考慮，要視乎表達方式，表達者既意圖，口號帶出嘅效果。「光時」口號未必成為禁語，但如果遊行示威時叫，風險就真係有。至於判刑對往後影響，叫做第一單判案囉，但唔係案例，因為要去到上訴庭先叫案例。整體而言判刑重過暴動罪，但其實可以理解，因為控罪涉及國家安全，係一個嚴重過暴動罪嘅控罪。（會唔會預期出現追溯潮、加控潮？）呢個你要問返律政司。
C：講起「案例」，真係好奇怪，明明上訴庭頒下嘅先叫「案例」，但你睇區域法院審快必，要等埋唐英傑案裁決先續審，然後仲話高院裁決「具高指導性」，sorry，我無呢啲法律訓練。
問：影響言論自由？
C：我當自己係律政司，你叫「We are Hong Kong」？點解唔係叫「We are Chinese Hong Kong」？你故意唔講Chinese，係咪有意圖要將Hong Kong從Chinese分裂出去？告得！係呀，係咁痴線，上鋼上線，要加「ed」，上咗鋼上哂線架啦，咁你話影唔影響言論自由？我見唔到判辭有半句講言論自由、表達自由。
Q：控方引用中國法、中國案例希望香港法庭參考判刑，做法有無問題？
B：法官已表明資料無約束力。
A：我地係普通法國家，大陸唔係普通法國家，控方畀案例係「完全無用」，淨係畀到人感覺香港法庭可以用大陸法例判刑，呢個畀人印象好差。
C：都有需要嘅，香港法律都無「情節嚴重」、「情節輕微」呢啲字眼，可能老爺奶奶都要啲協助呢。
Q：全個審訊你有咩感覺？
A：做刑事案最講程序，對個程序有合理期望（legitimate expectation）。成場審訊，個感覺係左一巴，右一巴咁車埋嚟囉，成場審訊感覺就係一場show trail，遊街示眾咁。
B：無咩特別
C：一年前唐英傑喺高等法院被拒保釋，法官李運騰喺判辭分析用「刑事訴訟程序條例（CPO）」考慮國安法案件保釋就足夠，果時我仲好樂觀，覺得仲有空間。但之後終審法院話咗李運騰係錯啦，國安法案釋要用「新標準」嘛。咁無啦，直頭唔知李運騰仲有無得做國安法法官。
後記
補充數據一些數字，《獨媒》統計至今最少有130人因國安法被拘捕。去年7.1《港區國安法》實施當日，亦即唐英傑案發同日，有9人被拘捕但未被起訴，他們當日被捕的原因，包括因背包藏有港獨旗、身上有「光時」文宣、手機殼背面有「光時」字樣。此外，前葵青區議員周偉雄去年7.21一周年在元朗站舉「光時」字牌，同樣是被捕後未被起訴。
from 獨媒 https://www.inmediahk.net/node/%E6%94%BF%E7%B6%93/%E3%80%90%E5%9C%8B%E5%AE%89%E6%B3%95%E9%A6%96%E6%A1%88%E3%80%91%E4%B8%89%E5%80%8B%E6%B3%95%E5%BE%8B%E4%BA%BA%E7%9A%84%E5%8F%8D%E6%80%9D%EF%BC%9A%E3%80%8C%E7%96%91%E9%BB%9E%E5%88%A9%E7%9B%8A%E6%AD%B8%E8%A2%AB%E5%91%8A%E3%80%8D%E6%B6%88%E5%A4%B1%E3%80%81%E3%80%8Cwe-are-hong-kong%E3%80%8D%E9%9A%A8%E6%99%82%E4%B8%AD%E6%8B%9B
