中国手段用黎處理香港問題，實炒，呢個定律嚟㗎嘛。
送中條例，六月九號百萬人遊行時候撤回，咪乜事都冇。林鄭傀儡死都要用中共高壓管治嗰套，血腥鎮壓，結果滿城風雨。
香港疫情，一早好似台灣咁切實封關，咪馬照跑舞照跳，時至今日確診總數都不足一千，成績彪炳。走去搞咩「小區」「清零」？圍封北角12小時，半宗案例都搵唔到，醜唔醜。
問題根源，就係香港政府唔肯正視，香港嘅社會情況根本同中国完全兩回事，永遠強行將中国嗰套搬過黎，失敗率100%。
—
香港呢個高度發展城巿，交通、經濟活動頻繁，香港人生活節奏極快，就算再努力保持社交距離，每日返工消閒，都可以途經幾百個唔同地點。我地唔係發展中國家、唔係中国近郊小村、亦不存在甚麼「小區」。
中国嗰套「小區清零」，只係適用係中国，人口流動不如香港頻繁，居民較長時間留係家中同附近「小區」嘅環境。香港地，少嘅係長時間留家嘅空巢老人，多嘅係即使年屆六十，都會跨區跳社交舞，都未退休要返工嘅人。
中国式圍封住宅區，就注定用左牛刀，卻連雞都殺唔到。立場早前分析，即使佐敦圍封區範圍大，但翻查區內過去三周確診個案，依然有七成人未曾到訪圍封區。結果成績慘淡，圍封兩日，強制檢測近萬人，卻只有13確診。
喂，我住東發大廈，唔代表我係東發大廈被傳染，亦唔代表東發大廈其他人會被傳染架喎。咁簡單都唔明？
—
香港另一個同中国唔同嘅地方，就係我地往昔成功嘅根基，唔建基於係「小區清零」、「國家安全」、「安心出行」之上，係「自由、法治、公義、平等」。
示威者抗爭，堵路幾小時，建制派如雷鼎鳴之流就話「佔中令香港損失11000億」。今日警方同政府唔止堵路，隨時成個區一齊堵，一封就一日、兩日，居民冇得返工放工、落街買餸，死吊命嘅餐廳外賣都冇得做。呀雷鼎鳴，咁大件事又冇人講？
用中国嗰套，代表香港人隨時因要「小區清零」被禁錮區內，隨時因「國家安全」所有資產即時冇預警被凍結，結果就係外商撤資、逃離香港、"Made in Hong Kong"都成絕唱。
曾經東方之珠，就因「中国手段」而隕落。
—
澳牛的黃昏、北角的黃昏，亦是香港的黃昏。
疫情只係呢兩年嘅事，但要梳理香港1997以後嘅一切政經議題，就必需要明瞭：香港、中国。
—
中国手段用黎處理香港問題，實炒，呢個定律嚟㗎嘛。
作者facebook
原文連結 https://thestandnews.com/society/%E9%A6%99%E6%B8%AF%E5%95%8F%E9%A1%8C-%E4%B8%AD%E5%9B%BD%E6%89%8B%E6%AE%B5-100-%E5%A4%B1%E6%95%97/
from 港文集 http://hktext.blogspot.com/2021/01/no-stake-100-768.html