（獨媒特約報導）警方昨日腰斬中環的兩個集會，並於港島各區與示威者爆發衝突。在警方以催淚彈「清場」後，灣仔及銅鑼灣一帶極為冷清，入夜後只有數檔食店營業。在鵝頸橋街市附近，卻遠遠可見一家生果檔仍然營業，店內大紅燈如常輝映。水果檔老闆阿B坐在舖頭一側，無視軒尼詩道整街防暴警察，仍堅持做到晚上十一點。「習慣咗」，他說，也慶幸催淚煙沒有波及店面。
生意大跌 斥警亂放催淚彈：無事無幹咁放，我真係好滾
反送中運動由6月開始爆發，阿B嘆，運動以來生意下跌近四成，「佔中都冇咁慘，仲衰過沙士」。晚上生果檔原本做灣仔附近的遊客生意，但「都死啦，夜晚冇生意架啦」。問他覺得責任誰屬，他輕嘆「都唔知點講，話警察又唔係，示威者又唔係」，但最後還是反問一句：「但都唔駛咁早放催淚彈㗎？」
處於橫街的水果檔，能看到軒尼詩道示威者與警察對峙的情境。阿B直言，以往每次都看得出警察清場的規律：六、七點才放催淚彈，並從灣仔至銅鑼灣方向有序推進。但他形容，今次警察的部署「亂咗」，未及下午三點，就已經開始施放催淚彈：「我都唔明你，你三點放乜嘢催淚彈？行囉，咪比佢行囉，行到六、七點佢放火你先再放囉。」目睹過多次港島區遊行的他說：「二百萬人流水式都係由佢，根本你唔理佢咪行囉。而家見啲細路女流哂眼淚，街坊行緊街買餸趕住走。唔係話搞住我做生意，但你無事無幹咁放，我真係好滾。」
資料圖片
自命「中間」 聽盡新移民、警察心聲：我哋真係唔同
記者問阿B的政治立場，他總會說「中間」。面對兩極的社會，他指「盡量保持自己清醒」，主動代入兩方處境。假設自己是警察，他想像到天天被街坊指罵「黑警」壓力會有多大；但他也明白年輕人沒有出路、無法向上流動，追求民主自由的心。談到警察的暴力，他再次代入：「而家你俾個膽我，包我唔會做到朱經緯，乜後果都冇。咁你嗌我『死黑警』，我扑唔扑你大力啲？我打你都嫌細力啦。」
偏向「中間」的阿B，也因此於不同立場之間游走，聆聽很多人的聲音。他指，這一帶水果檔的夥計大多是新移民，總是怪責示威者搗亂。阿B的夥計也向他說：「都出左反對通知書，點解仲要出黎行？」、「警察放催淚彈你就X，啲人出嚟暴動，就半句讉責都冇？」又批評追求民主自由，只會令中國四分五裂。對於種種批評示威者的說法，阿B認為是來自兩地的想法差異：「我哋土生土長香港人，會明白（示威者）嗰感受。但佢地唔明㗎，真係好藍，會『曱甴曱甴』咁講。唔同㗎，我地諗法真係唔同。」
阿B也有一個警察朋友，衝突發生時會特意發訊息來關心他有沒有受波及，反送中運動以來亦不時見面。他形容，警察的壓力大，但自己有仔女的，通常都不會那麼「狼死」，「點打得落啫？好似自己個仔女咁大，最多咪掃X佢走。」 警察朋友言談間「每一句都係曱甴」，阿B通常都不會回應，因他知道，「佢地淨係睇嗰方面嘅野」。
「其實我係香港人，我都係偏黃」
另一邊廂，阿B又有一個深黃的妻子，閒時會做文宣，掛在嘴邊的是「香港人每人都要付出少少」。阿B笑言，這幾個月生意下跌，「我都真係埋緊單」。妻子任職航空公司，早前有員工因政見被「篤灰」解僱，阿B直言，妻子的公司「而家真係唔俾講野」，只能與朋友私底下討論。而只有中一的兒子，在學校課堂上看到很多警察打人的片段，也會跟住叫「死黑警」，連彈琴都會彈奏《願榮光歸香港》。
社會分裂蔓延至各人際網絡，本來聯誼的舊同學群組，也悄悄分成兩派。阿B笑言自己「屎忽痕」，黃藍兩邊的群組都有加入，但還是忍不住道：「我見佢地藍嗰啲，真係冇乜中肯，好多假消息。我一句都冇答。」曾有示威者收八千元參與抗爭的陰謀論，阿B開頭都相信，但後來親眼見到示威現場「有老有嫩」，越來越多人走上前線，他也覺得「啲靚仔毛都未出齊，點收八千銀？」再問阿B的立場，這次他沉思了一會才回答：「其實我係香港人，我都係偏黃。」
衝突主因皆政府 前路茫茫：都唔知點收科
反送中運動近五個月，社會撕裂、街頭衝突頻仍，阿B覺得，歸根究底還是政府的問題。他不諱言：「好嬲個政府搞到咁」，「成日諗住乜X都夠票、㩒制又話通過」，指一百萬人上街反修例仍硬推，到三個月後才宣佈撤回已經太遲。如今警民衝突嚴重，影響更是深遠：「你啲後生仔，嗌黑警嗌多幾多年？起碼都嗌多幾十年」。他又言，陳同佳一案換來整代香港人對政府和警察的仇恨，「都唔知點收科」。
眼見大量年輕人不顧安危走上前線，阿B近來也考慮送兒子到外國讀書，擔心他留在港會受朋輩影響，終走上街頭被捕：「始終係自己個仔，一定想保護佢」。近月他也與妻子補領BNO，「明知英國不會收留，起碼也可以揸住先」。談到將來，阿B盡是黯然，說得最多的是「點收科？」。
夜幕低垂，他點起一根煙，苦笑道：「冇嘢做嘛。」
記者：黃蕊獻、陳世浩
from [香港獨立媒體] https://www.inmediahk.net/node/1068352