1. 西九一地兩檢勢在必行，政府講明無論有冇立法會的支持，都會照樣向中央政府提出。現時有關政府方案的法律爭議，很多朋友都回應「我唔去西九咪冇事囉」或者「你返得大陸都預咗啦」，以為可以置身事外。對此，很多法律界的朋友已經提出《基本法》第20條的缺口一打開，下次就乜都得，包括特區主動放棄《基本法》第23條的權利等等。今日我就想同大家討論一個眼前的問題：西九地底行第二套法例，無論你行唔行入去，都係會影響到你同我，因為無線電波是不會在只停留在西九地底的。
2. 首先回一回帶，政府現在建議的是什麼？政府說在「內地口岸區」內：「由內地管轄的事項，適用內地法律，由內地法院行使司法管轄權」，而「由香港特區管轄的事項，適用香港特區法律，由香港特區法院行使司法管轄權」。怎樣劃分內地事項和香港事項呢？政府提出了六項括免，包括履行職務、保險、維修、消防、安全等，視為香港事項。除此之外，一律視為內地事項。
3. 咁就大件事了。中國內地有條法例叫《國家安全法》，依照呢條法例佢做乜都得，包括合法在西九地底通過電子訊號入侵香港人的手提電話。到時無論你響邊，打過電話俾邊個，睇過咩網頁，上載了什麼「閃卡圖片」去雲端，全部一眼睇晒，並且成為日後用來威脅你的方法。
4. 點樣可以做得到？可能的方法有兩個。第一個是以《國家安全法》當中「 及時報告危害國家安全活動的線索」的條款為由，要求港⽅職員提供「內地⼝岸區」內由港方控制的本地電信設施或電腦系統進行搜查，或要求監察香港境內電子通信。例如流動電訊公司在西九地底的發射站，就可以多了一條直線駁返中國內地。大家都見到，《國家安全法》會同政府提的「六項括免」有直接衝突。至於到時邊個話事，大家都估到。
5. 或者你會問，只要流動電訊公司不要在西九地底設置發射站咪得囉？唔好意思，仲有第二招：中國內地當局可以直接在西九地底設立假發射站，模擬香港流動電訊公司的訊號，用無線電波迫你在站外的手提電話和這個假發射站連接上。按照美國網絡人權組織 EFF 的研究，這些假發射站足以套取各種數據，包括信息內容。假發射站又可以發出攻擊，使到你的手提電話在必要時忽然打不到電話。類似招式在有人權法案保障的美國也常常被地方政府濫用，來到西九會變成點，大家都估到。
6. 現在不少朋友北上過關之前，都會習慣關閉數據傳送，甚至直頭帶第二部手提電話過關，就係想保護自己同埋朋友的個人資料。買電子產品，好多朋友都不會買國產的，以免入面有監察裝置。要購物，大家都寧願用「八達窿」不用「支負簿」。以後唔洗煩，因為在香港已經冇私隱的了。我相信會有IT界的朋友指出，政府要勾線其實仲有好多方法，不過香港有《截取通訊及監察條例》，政府亂勾線其實是犯法的。以後有了西九，就可以完全合法咁做呢件理論上在解放軍軍營都不可以做的事了。
7. 中國內地法律何其多，實會有一兩條和政府提出了六項括免以及香港人的價值觀有所矛盾，呢度只係舉一個例子，要講真係有排講。點樣可以解決？成個一地兩檢搬上中國內地的車站做咪得囉。
作者博客
原文連結
from 港文集 http://hktext.blogspot.com/2017/11/623.html