經過嶺大梁粉鄭國漢出任校長後，你還會對港大遴選新校長有期望嗎？
當港大選了一名英國醫學教授當校長後，總算放心，加上睇到程介明、陳婉瑩及盧寵茂三人同一口徑，指責新校長不懂中文，不懂國情，更加令我相信港大揀對了人。
一個抱住「做好呢份工」心態嘅洋人校長，比熟悉國情，希望將港大貢獻俾祖國嘅華人校長強得多。因為港大呢十幾年比「愛國」折騰不已，令校友痛心疾首。李克強到訪818事件係最後警號，徐立之學術生命始於北美，但始終甩唔到海外華人「胸懷祖國」情意結，結果在港大百周年慶典上，俾特區公安進駐校園戒嚴，禁錮示威學生於後樓梯，封鎖薄扶林道，最終葬送了徐立之連任之途，也賠上港大學術尊嚴，校友聲討不絕。
熟悉國情華人校長，之前有鄭耀宗，今有徐立之，身為大學祭酒，因熟悉國情而死於政治之手，令港大蒙羞。鄭耀宗當然希望香港好祖國好，既然港大出了個專門抬槓民調專家鍾庭耀，對祖國支持之董建華政府產生不良影響，為了考慮偉大一國兩制實踐之國情，對來自特首辦傳話人路祥安心領神會。假如當日校長係不懂國情之洋人，港大應可避過此一劫。又818事件，校長假如不明國情，以天真無邪態度詢問警務處長「港大是否由警方接管全面戒嚴」，經此提問而曾偉雄仍不知改進，最終即使爆發李成康被禁錮事件，港大也可置身事外，不會成為幚凶。
香港之悲哀，在於今日我們應該期望明天將會更好，還是明天不要更差？係人都知最好搵個牛津、劍橋、哈佛名教授坐鎮港大，但「中國國情」二字恐怕已令一線學者卻步，香港只能夠在二線洋人與「一線」土炮之中作選擇。回歸現實，假如係馬斐森與雷鼎鳴、盧寵茂，你會揀邊個？香港今日還可以有崇優擇優的可能嗎？大家撫心自問。
嶺大揀出一個政治教授鄭國漢，已嚇怕了港大長老，啟動了防禦mode， 馬斐森勝出，好簡單，就因為佢不懂國情，起碼主動迎合權貴政治機率較熟悉國情之華人學者低。至於港大將來是否在內地成功辦學，有否祖國視野，單單港大深圳醫學院如何收科，已足夠令港大高層頭痛不已。
辦大學不比搞上市集資玩財技，東京大學、新加坡大學沒有所謂大中華概念，一樣排名節節上升，超越港大。假如要批評馬斐森，一眾熟悉國情之一線本地華人教授，不妨細心想想，是什麼原因令香港失去了崇優擇優，變成了 Choose the less evil 遊戲？
其實就是「國情」二字！