當啲偽左膠聖人，繼續貫徹佢地嘅中國壞鬼讀書人性格，不食人間煙火為蝗蟲論扣帽子果陣，除咗捍衛言論自由外，我都認為有必要去幫啲香港平民講嘢，而唔係扮聖人然後指指點點，乜都唔做。
喺日本大政奉還，王政復古之後，同勝海舟喺江戶台場談判，最終成功無血開城嘅功臣西鄉隆盛，喺新政府擔任陸軍大將，照理佢應享受成果至係。但佢見到明治維新後，下級武士無飯開，話雖征韓征台都係唔啱，但班武士又確實除咗打仗，乜都唔識，當時係無職業訓練呢個概念，亦唔似德川家嘅家臣，可以喺勝海舟領導下，轉型去橫濱做生意，靜岡種茶葉賺大錢。
佢講咗咁多，大久保利通、木戶孝允(桂小五郎)唔聽，佢寧願返家鄉鹿兒島開私塾教武士道。1874年開始，啲無飯開嘅武士已經周不時起兵惹事，搞到九州一帶雞犬不寧。到咗1877年，薩摩嘅武士攻擊政府軍火庫，開始西南戰爭。其實西南戰爭開始果陣，西鄉隆盛唔係統帥，亦唔在場，但佢知道武士叛變之後，如果由得呢班薩摩嘅憤怒武士亂咁舞，仲要好多係佢間學校嘅學生或畢業生，最終日本可能真係一鑊泡。佢就以佢嘅威望同埋老師嘅身份，接手領導軍隊，並且以「質問政府」之名起兵，最終佢都付出咗生命。
用得「質問政府」呢個名，西鄉隆盛嘅目的好清楚，我唔係要奪權，要做官，而係你唔該搞掂開飯嘅問題。
佢死之後，明治政府褫奪佢嘅官銜，但日本民眾不分派別奔走相告，喺1889年，大日本憲法頒佈果陣特赦，喺1897年，中日甲午戰爭打贏後兩年，上野恩賜公園豎立西鄉隆盛嘅銅像。果時，西鄉隆盛茲茲在念嘅武士開飯問題，已經得到解決。
西鄉隆盛嘅主張或者有問題，但佢唔出嚟領導群眾，導正群眾，日本武士無飯開問題依舊存在，唔通無西鄉隆盛，就代表武士有飯開，呢個簡直發神經，可能更大鑊嘅事會發生。而下層民眾確實係希望喺生活極度挫折，而政府屢勸不聽果陣，有人替佢地出頭。而西鄉隆盛雖死，只不過日本方向亦都改變，至少佢生前主張征台征韓，都實現咗。所以喺維新三傑之中，日本人最尊敬正係西鄉隆盛，維新政府扭盡六壬點抹黑西鄉隆盛都無用。
啲社運人成日將向弱者抽刀掛喺嘴邊，我想問，依家係啲中國大款嚟香港被人叫蝗蟲慘，定係本地無助孕婦慘？被中國人呼呼喝喝嘅入境處官員慘，定係被人呼喝一吓啲中國人慘。唔少嚟香港自由行嘅蝗蟲，唔單只喺香港搞到寸土不生，喺中國一樣係蝗蟲，呢班仆街啲錢邊度嚟。徵地、貪污、官商勾結，你班社運膠幫呢班友辯護，你有無搞錯。
無陳雲，無我，無林忌，一樣大把港媽、高登仔不滿依家嘅局面，作為一個堅持真正讀書人之道嘅人，我寧可去做西鄉隆盛。
from MO's notebook 3.75G http://blog.martinoei.com/2012/02/%e9%bb%9e%e9%83%bd%e6%9c%89%e4%ba%ba%e8%a6%81%e5%81%9a%e8%a5%bf%e9%84%89%e9%9a%86%e7%9b%9b/?utm_source=feedburner&utm_medium=feed&utm_campaign=Feed%3A+MosNotebook375g+%28MO%27s+notebook+3.75G%29